انت والخيبات
د/ احمد خليفه
الحياة مليانة مواقف مؤلمة
من أكثر المواقف المؤلمة ال ممكن تتعرضلها في علاقه هي خذلان شخص بتحبه ليك عن طريق خيانته ليك
ساعتها بتتصدم بتحس ان الحياة وقفت من حواليك وان روحك مسحوبه منك و تبدا تسال نفسك أسئلة مميته ملهاش إجابات ياترى ليه عمل كده ايه ال ناقص فيا و ازاي هنت عليه بعد كل ال عملته .. الخ ..
ساعتها بتكون حيران و الحيرة بتكون أرض خصبة للخوف
جوانب حياتك أغلبها بيتاثر بشكل سلبي حتى الوظائف الطبيعيه زي الاكل و النوم بيحصل فيهم مشاكل
تصرفاتك بتبقى متناقضه بين انك عايز تسامح علشان انت بتحبه و بين انك تفارق علشان كرامتك و بين انك تنتقم علشان كبريائك
لحد هنا ده ممكن يحصل لكل الناس لما تتعرض لموقف مؤذي و مؤلم زي ده .
لكن اكيد مش كل الناس زي بعض
الناس أنواع في طريقة استقبالهم للصدمات بشكل عام و الخيانه و الخذلان بشكل خاص
وهنا ياتي ٣ أنواع من الناس في طريقة تعاملهم و انت تحدد انت انهي واحد منهم
النوع الاول
رغم صعوبة الموقف و الالم الشديد
في وقت قصير بيقدر يتقبل الموقف و ده بيكون نتيجة أنه شخص متين نفسيآ
ده مش معناه انه ماتاثرش و تعب لكن هو قدر يستوعب ان البشر خطاء و قدر يتخطى الموقف بشكل ما و وصل لقراره سواء كان هيكمل أو هيغادر بعد ماحسبها و عاش الحل
دول ال بيطلق عليهم أصحاب الصمود النفسي .. الناس ال بتعيش الحل و بتقدر تتخطى الأزمة مهما كانت صعبة في أقل وقت ..
النوع الثاني
ده بيكون مش قادر يستوعب الموقف علشان كده حياته بتتاثر لفترات أطول
الذكرى المؤلمة بتبقى مش راضيه تفارق خياله
رغم انه ممكن يكون عايز يعدي الموقف ورغم انه ممكن يبدأ في ممارسة حياته من جديد و بياخد نصايح من الناس و بيقرا حاجات و يمكن كمان يحسس الطرف الآخر ان الموضوع خلص لكن هو بيموت في اليوم الف مرة كل ما يفكر في ال حصل
وده الالم بيفصل يخبط بابه كل شويه
حتى لو بين عكس ده بيكون عايز حلول عمليه تساعده يتخطى المه و يعدي الموقف لكن مش عارف يبدأ منين
لحد ما يبدأ ياخد قرار التعافي و يبدأ يخبط باب الوعي عن طريق طلب المساعدة من ربنا و من شخص متخصص يساعده يتخطى أزمته بشكل علمي و عملي و لو ( مخبطش باب الوعي هيفضل الالم يخبط بابه )
النوع الثالث
ده شخص مابيقدرش يستوعب الموقف و لايهضمه بشكل مبالغ فيه و حياته بتتوقف فعليآ لدرجة أن المشكلة بتفضل تتفاقم جواه مهما عدى الوقت
اي حلول بتتعرض عليه بيكون شايف انها مش هتناسبه
حتى لو طلب الدعم ممكن يفشله لانه هو شخصيآ واخد قرار داخلي بشكل لا واعي انه يحافظ على المشكلة و أنه مايتخطاش الصدمة
ماسك في كلمة ( مفيش حل ) و اليأس مالي كيانه لان ده بيحميه و بيوفر عليه مسئولية و مجهود التغير و طريقة التفكير ده بتخدم على دور الضحية ال هو بيلعبه بدون وعي من زمان
في النهاية المواقف المؤلمة حقيقة و خيانة شخص عزيز ليك ده مش نهاية الحياة
سواء قررت تكمل معاه أو تنهي حياتك أو العلاقة بينكم انتهت بالفعل ماينفعش تفضل مكمل حياتك تعبان نفسيآ لأنك لو فضلت كده في النهاية انت الخسران
علشان كده ابدا حدد الموقف ده مأثر عليك و على علاقتك بنفسك و بالطرف الأخر ازاي ؟
ابدا حدد بكل صدق مع نفسك انت من انهي نوع من الثلاثه ؟
ابدا صدق انك تستحق حياة أفضل و ينفع تقلب صفحة الماضي مهما كانت مؤلمة
