ولاد الأصول…!
بقلم الكاتب /أشرف فتحي عبد العزيز
عندي قناعة كاملة إن اي شخص يتكلم أو يكتب أو يسجل فيديو ويحكي أمور خاصة وعائلية بعد الانفصال او البعد أو الفراق عن حد على مواقع التواصل الاجتماعي، فهو انسان مش أصيل ولا ينفع يكون اهل للثقة او يؤتمن على سر او حياة حد تاني …!
علشان اللي يخرج أسرار بيته يبقى انسان ملوش أمان النهاردة اتكلم عن شخص كان عايش معاه واكل معاه عيش وملح وممكن يكون في اولاد بنهم وتحكي بعد الانفصال او الفراق عن عيوبه وعن شخصيته وأسرار حياته تبقى أنت شخص خاين، علشان بكرة لو ارتبطت بحد وسابك هتروح تتكلم عنه، علشان معندكش اخلاق وتربية وأصل…!
وتاكدوا ان اللي يعمل كدة يبقي هو اللي ظلم وباع وبيمثل دور الضحية، اتربينا على كلمة البيوت أسرار ومحدش يدخل او يعرف اللي بين الزوجين حتى لو مفيش نصيب وافترقتكم ، وافهم معني كلمة (الستر) علشان ربنا هيحسبك عليها اوووي، فخليك ترند وعيش الدور واغتاب وافضح في الناس ونفسك علشان حسناتك في الدنيا تزيد في ميزانك يوم الحساب وبعدها استني الحساب وهتعرف حسناتك اللي عملتها هي سيئاتك في الآخرة وبعدها مفيش ندم …!
كل الكلام ده مرتبط بالتربية اللي اتربيت عليها لأنك هتكون عنوان أهلك قدام الناس هنا بيظهر معدن ولاد الأصول اللي بقوا نادرين دلوقتي …!!!
