عبدالله أحمد يكتب : حاجات لازم تتعلم تبطلهم

يشير استشاري العلاقات الزوجية والاسرية أن التعلم أمره سهل..

اننا نتعلم نبطل الحاجات اللي اتعلمناها هو اللي صعب.. وهو دا التحدي الاكبر

ويضيف دكتور عبدالله أحمد قائلا بس بصراحة في حاجات كتير الحياة علمتهالنا وبنفضل عايشيين بيها عمرنا كله ولازم نعيد تفكير فيها اننا نتعلم نبطلها..

وهنعدد منهم مجموعة نقاط مهمه :

١- اتخلص من فكرة إن لازم تكون مشغول طول الوقت، ومش معنى ان انت مشغول وبتعمل حاجات ده معناها انك منتج..

واتعلم يكون عندك وقت راحة باستمرار ومتكونش حياتك مضغوطة طول الوقت لان ده بيأثر على صحتك النفسية بصورة كبيرة

٢- اتخلص من فكرة إن تواجدك لوحدك معناها إنك وحيد..

واتعلم تقعد مع نفسك وتأنس بها وتتكلم معاها وتفكر معاها ومتحسش بالوحدة وانت لوحدك، وده ميمنعش احتياجنا للآخرين في حياتنا

٣- اتخلص من فكرة إنك لازم تعيش سعيد..

واتعلم إن المشاعر مختلفة وممكن أحيانا تكون حزين أو قلق وإن كل المشاعر طبيعية ومن حقك..

٤- اتخلص من فكرة إنك لازم تفكر بمنطق ولازم كل قراراتك تكون صح..

واتعلم إن الإنسان بيخطأ ساعات، وممكن ناخد قرارات مش منطقية أحيانا، ونتقبل نتيجتها، ده ميخليناش أشخاص سيئة، ولكن يخلينا أشخاص حقيقية تخطئ وتصيب..

٥- اتخلص من فكرة صح وغلط..

واتعلم إن مفيش صح كامل وأو خطأ كامل ولكن الحياة متشابكة وكل موقف ورده ممكن يكون كده أو كده، وبطل تحكم على أخطاء الماضي بفكر دلوقتي..

٦- اتخلص من فكرة إن النجاح هو النهاية..

واتعلم إن الحياة رحلة طويلة، فيها نجاحات وفشل، والاتنين بيكملوا بعض، والنجاح مش نهاية القصة، ولا الفشل، واتقبل الاتنين بمشاعرك المختلفة ولكن متوقفش الحياة عليهم..

٧- اتخلص من فكرة “أنا عارف كويس أنا بعمل ايه”

واتعلم إن مش لازم نكون عارفين كويس، وأحيانا ممكن نسأل وأحيانا نصائح اللي حوالينا متكونش مناسبة، ولكن لازم دايما تكون سايب مساحة جواك تقبل دخول معلومات مختلفة من العالم الخارجي

ويختتم استشاري العلاقات الزوجية كلامه نبطل الحاجات اللي اتعلمناها مش سهل.. بس مش مستحيل وبيساعد حياتك تكون أحسن ونفسيتك أقوى.. ودايما عاوزين نقوي مناعتنا النفسية، أحسن حل إنك تتكلم مع حد متخصص عشان يساعدك تعمل كده بشكل سليم.