#النشــيج . شبكه اخبار مصر
(شعر)
أشرف الفرانى
سعف النخيل لَّما يميل بينِز بالطَلق العَفى
وتُرد روحنا الأجوبه ساعة ما بنفيض باعتراف
والقلب يبقي ف اصطفاف المجروحين
الذنب ذنبى والخطأ مردود عليكى
إنتى اللي خُنتى لَّما كان القلب ساجد للغوايه ومِحتِفى
الحلم هايكون ف الرجوع
أما الخيال .. إنك تتوبى وتنصفى
بين ألف فرصه وفرصه خطيتى النصيب الحلو
ورميتى نفسك ف المصير المُر
….. بكره تحكي وتوصفي !
القلب كان بيساع كتير
ضغطك عليه خلاه يعانى بارتجاع ف العشق
.. جايز يكتفى !
باللي جرا له واللى جاله
واِللي تجاوز ف احتماله
يفرق معاه لو كنتى “فكره وتختفى”
سعف النخيل عَجِّز ومن فوق الجريد
مال باعتلال وما عاد فَتِى
ولا عاد يحرَّض ع الشغف
ولا عادشى قادر ف الهوى
يختار حبيبُه ويصطِفي .
