إيه بقى
إيه بقى
بقلم / رأفت عبد العال
طب إيه بقى
إيه م الأماني مورقة
ليه خدتي مني البال بعيد
وزرعتي بإيديكي الجفا
قلبي رميته في سكتك
وشعوري أصبح لعبتك
ليه رسمتي بإيدكي الوجع
مكتوب على كفوف القدر
أدفع تمن عمر الوفا
واجمع حنين الشوق جراح
واشرب مرار غدر البشر
طب ليه بقى أصبح غريب
وعيوني دوبها السهر
ليه قايده جوه الشوق حريق
ليه مانعة عيني م النظر
طب ليه بقى أصبح شريد
وينطفي في عيني القمر
طب إيه بقى يفضللي إيه
غير الجراح غير البكا
قلبي اللي حفظك من سنين
بتهدي فيه كل الحنين
وتبردي فيه الدفا
آهين وآه كان بقى
ياللي زرعتي الشوق بشوك
بدلتي قلبك بالحجر
أعيش بنار طعم المرار
وأنا اللي في عروقك ندى
يافاردة شعرك ع الجراح
ياقابضة من دمي التمن
طب ليه بقى ؟!!
أحلم بشوق يطرح جديد
وآخره أحصد الندم
ياللي أنتي خدتي البال بعيد
ليه ساقية آيامي بشجن
ليه كل ما انسى واقول خلاص
بتصبي في عروقي الندم
أنا من جديد حبدأ واعيش
كل اللي فاتني يازمن
ولا اترسم جوه الجراح
ولا افتكر بيكي اللي راح
وآهين وآه كان ليه بقى
وخلاص خلاص أنا من جديد
دافع التمن
شبكة أخبار مصر ٢٠٢٠/١٢/٢٢
