أدب وشعر
أيام
بقلم /الشاعر والأديب د. إيهاب البعبولي
في أيام… كانت بتجمعنا
صوت الساقية والعصافير
وصوت امي ..وصوت اختي
وصوت عمي…. مع النواعير
وبسمة حلوة…… و ضحكاية
وكام صرخة…. مع المزامير
شقاوتي و شربي…….م القلة
وصب المية …. جوه الزير
وكام كدبة ….وأقول بيضة
وف كام مرة …يكون تأخير
وحمومي في… مية الترعة
و رغم إني بموت……تحذير
ونبني بيوتنا….. برمل وطين
ونجري نطارد ….. العصافير
وكام توتة بتجمعنا ..وتزرعنا
تريحنا و تسعدنا تملي كتير
وكانت في كل ايامنا وايامها
وأحلامنا وأحلامها هي الخير