قصيدتى “اصل القصة”
بقلم: ريم جابر
اسمع ياصاحبى اصل القصة والحدوتة
وخدها حكمة واياك تصاحب الردى
وحتى لو مالقيت اصحاب
صاحب ولاد الأصول وانتمى ليهم
وخدهم اليك احباب
واياك تحاول تغير فى طبع الردى
عشان قالوها زمان الطبع غلاب
وخلى بالك لميلة الزمن واعملها
الفين حساب اصل الزمن قلاب
ومتظلمش حد فى دنيتك
عشان الفلوس ياابن آدم
مهما تجرى ومهما تعمل
اخرتها حفرة وكوم تراب
وهتندفن لوحدك ياجدع خليك
طيب السيرة والذكرى
خليك فكرة تتحكى مابين الناس
بطيب الأفعال ويعملوا لذكراك
فى المجال مليون حساب
ولو صابتك عيون الناس
خليها على المولى
واياك تذهب لقليل الدين
يعملك بخور وحجاب
ويرسملك حبة طلاسم
على ورقة منجوسة
ويسقيهالك فى المية شراب
ولا تزعل على قريب فى يوم
قفل فى وشك باب
ساعات كتير القرايب
بيكونوا ذئاب وكلاب
والرحمة ومدة الايد والطبطبة
والمودة بتجيلك من الاغراب
وجاهد فى سبيل عيشك فى كل مكان
واياك تفضل ياجدع تعيش كسلان
تجرى وتتوهم وراء الحفاير والسرداب
دى الدنيا حظوظ ياجدع وسبحانه
علا شأنه هو مسبب الأسباب
