أدب وشعر
الطيبين
( شعر ) أشرف الفراني
………………………
بابدأ نشيد السلام
ع الشقيانين ف الحَر
يصبح كلامي خفيف
عليكوا ياْهل الشر
موش كل زاعق وناعق
لاحق وابور البيان
ولا كل من يكتب كلام
ع المدّاحين يتغَّر
فيه ناس غموسها الحمد
ف اللوصه
وناس علاولا
ف اليَغمه نشوانه
أهل الهوي والمنشدين
مساكين ..
شايلين وجعهم جبل
م العجز ف الهيصه
باركين علي رزقهم
بين الأمل و”الأهر”
سابغين وجوههم سواد
زاد غمّها م الشمس
سارحين مُزامله ع الغيطان
بالعزم والمعروف
مستنيين الحصاد
كيف انتظار الدهر
حافظين كتاب ربنا
والصالحين أشباه
كاشفين صدورهم رحايه
تطحن الأوجاع
عايشينها صدفه وحظوظ
ومايعرفوش أسباب
أحرار بحِس الوفا
ساعة صفا للَّٰه
عارفين بطون الجواعي
من لفة التلافيع
باصين بعين الشبع
من خُرم ف الحيطه
بنفوس ملاها العشم
ف الدنيا والأغراب
ع الفطره طيبه وسذاجه
بيصدقوا التقاليع
فين يسمعوا المواويل
بيميلوا ع المزمار
وإن قولت “طوبى” لحياتهم
بيجهزوا المقاليع !
……………….
#شعر/ أشرف الفرانى
