نصيحة أب صعيدى لابنه
الشاعر :عاطف محمد
باللهجة الصعيدية الرائعة
:لازم تذاكر ياعبد السميع
وتبجى رجولة وترضي الجميع
تفرح أبوك اللي طافح مرار
وتسعد بهية ومنال وانتصار
خواتك بنات وعلامهم بسيط
مناهم تخلي عليتنا تزيط
وتفرح ف يوم التخرج ياولد
وتبجى حكاية كلامها غويط
ياعبده حياتك هاتبجى مليح
وتبجى أيامه وجيافه بصحيح
خصوصا ف ساعة توظف جنابك
حدانا ف نازلة حمادة اسماعيل
هاتبجى ساعتها تشرف خواتك
وترفع ف رأسهم لفوج السطوح
يوميها هاتخطب بهانه إبراهيم
ونعمل عازومة كبيره وتنين
وندبح جاموسة وكمان معزتين
وفته ونعمل فرح جمعتين
علامك ياعبده هايبجى الطريج
لكل اللى عايز يكون الرفيج
ف درب المعالي تنور يانجم
يشاوره عليك الجميع باحترام
علامك ياعبده هايفرج كتير
ف دنيا تجدر جناب الكبير
بعلمك ياولد المرار يبجى لوز
وتاكل فراوره ومنجه وموز
تصيف ف بحرى سبوع كل عام
وتعمل لبيتنا سلالم رخام
وتبنى فى سطوحنا براج الحمام
وتكسى خواتك بكسوة مليح
ياعبده أنت خابر تمام الفضيحة
بتاعة كمال ابن عمك سميح
وخابر كودوبته الكبيرة عليهم
وهمهم بأنه بيدرس طبيب
وأنه هايشفى آلام الغلابه
ويبجى جليبه بينضح طيابه
أتاري البعيد شبع م السجيط
وساب العلام وداس ف الغويط
وضمه غباءه لسوء الصحاب
وتاجر ف كل اللي جاب الخراب
لعقل الشباب المليح المنور
وجبضوا عليه فى نقله تغور
أيوه طب ساكت وراح المليح
وصارت معايره لعيلة سميح
حذاري ياعبده صحاب الطريج
تخير ياولد اللى فيهم رفيج
يشيلك فى شدة وزنجه كبيرة
ويخلص لآخر حياته الطويلة
لجيتلك مكان ف مدينة الطيلاب
مجاور لسور العلام ف الآداب
وجنب التجارة يدوب فرق باب
وقبل الزراعة ومحل الكباب
توفر فى وقتك ودوخ النجيل
وزحمة مواصلة تضيع كتير
وجمعك ياعبده ف سيدناالحسين
ولازهر… ونور كمان شمعتين
وحذر ياعبده تقع في البنات
ويشغل فى بالك مياصة كلامهم
حلاوة بهانه ….تعدي رقابهم
دى أجمل بنات البلد… أجمعين
وأوعى تحزب فى نفسك ياولد
دي مصر اللى باقية ودايما تسد
وفكر فى كل اللى تسمع كلامه
ودور حديت الجميع جوه راسك
تنقي اللى يرضي ضميرك وناسك
فيبقى مداسه عمامه لراسك
ياولد الحكايه ماهش ضرب نار
ورقصة مليحة ودفين وطار
ده شغل البغابغ هايطلع نهار
يسيح أساسه كأنه مافيش
خلاصةالنصيحةهاترضى اللى خلقك
وتتبع ف سنة رسولنا الكريم
ووطنك مايجي عليه اللئيم
وأهلك يكونوا ف حبابي عنيك
وابور المحطة صفيره عا.. ينده
ماتركب ياعبده وخلص ف يومك
وحط النصيحة… فى شنطة هدومك
وتبت عليها سنين السنين
وقول للي جارك ف كرسي الوبور
أبويا نصحنى نصيحة عبور
لبر المحاسن وخير الأمور
عشان أبقى راجل وانول القبول
: وأنا بوست يده أمام الجميع
شكرت اللي قاله لعبد السميع
لا يمكن راح انسى ياابويا الكلام
وهابقى برنجي فى كل العلام
واخلص واجيلكم بصحة وسلام
عشان ابقى راجل دواه العلام
:معاك السلامة يا زينة الشباب
يااجمل حكاية تنسى العذاب
:سلام يا ولدي …ياعبد السميع
:سلام يابوي ..ياحج عبد البديع
