تبادل الاتهامات بين مؤسس معا لإنقاذ إنسان وأمين الصندوق
متابعه / عزة حسن
نشر حاتم زهران امين الصندوق السابق لمؤسسة جمعية معآ لانقاذ انسان منشور يتهم ادارة المؤسسة بالنصب في جمع التبرعات ليرد عليه مؤسس المؤسسه محمود وحيد بأتهامه بالنصب ايضآ
وجاء منشور زهران كالتالي
بعد صمت طويل، لأول مره هتكلم و اعتقد ممكن تكون آخر مره … فسامحوني علي الإطاله عشان دي شهادة امام ربنا سبحانه و تعالي.
اللي هقوله انا واثق انه هيكون صادم لناس كثير و لكن هيكون فيه اجابات علي اسئلة اكثر … و في نفس الوقت هيفضح فساد كبير.
بداية … انا أمين صندوق مؤسسة معانا لإنقاذ انسان لكل الناس اللي ممكن تكون متعرفنيش شخصيا و كلامي اللي هقوله هو شهادتي اللي هتحاسب عليها امام ربنا سبحانه و تعالي و امام اي جهه تحب تحقق و تنقذ ما يمكن انقاذه.
انا بدأت العمل الخيري بكل النواية الصافية من اكثر عشره سنوات وكنت اعمل بكل طاقتي وارفض الظهور الاعلامي لان دة باب خير بيني وبين ربنا … و طبعا ده لازم يكون بدون رياء، عشان كده ممكن ناس كثير تكون متعرفنيش.
اغلب الناس القريبة مني تعرف اني عضو مؤسس لمؤسسة معانا لانقاذ انسان اللي مرت بازمات كتير والحمد لله وبفضله استطعت ان امر من هذه المواقف الصعبة لتأكدي من عدم وجود اي اخطاء في داخل النظام الاداري الخاص بالمؤسسة الذي صنعته وكونتة وتحت ادارتي في داخل المؤسسة من اول يوم.
الحكاية بدأت مع تكريم المؤسسة من دولة الامارات العربية بجائزة مالية ضخمة لم يدخل منها ولا جنية واحد للمؤسسة و اللي كان بالنسبة ليا صدمه كبيره .. لان طبيعي ان الجائزة تحصل عليها عشان تطور مشروعك الخيري مش تحطها في جيبك … بس مش مشكله ده اللي حصل وقتها لان الجائزه خرجت بإسم رئيس مجلس الإدارة.
في بداية عام ٢٠٢٢ بدأت اكتشاف إيصالات غريبة مع المتبرعين لان بعض المتبرعين بيبعتوا الايصالات للكول سنتر ومن هنا جاءت بنت بإيصال حاولت ادخله علي السيستم لم يدخل وتم الكشف على رقم الايصال وجدته مسجل منذ فترة باسم متبرع اخر و ده معناه ان في ارقام مكرره !!
دي كانت اول صدمه، ومن هنا عرفت بوجود إيصالات مزورة مع بعض الموظفين بالمؤسسة بيجمعوا بيها التبرعات بدون علمي كأمين صندوق و مسؤل عن التبرعات بالمؤسسة … قمت بالبحث عن قيمة هذه الايصالات و التبرعات و تأكدت انها لم تدخل حسابات المؤسسة بأي شكل من الاشكال، مع العلم انني انا المسؤل الوحيد عن الماليات و بالتالي لو دخلت حسابات الجمعية كان هيكون من خلال ادارتي و بعلمي.
و الغريب ان هذه الدفاتر تم طباعتها بنفس الرقم المسلسل الخاص بالمؤسسة ونفس شكل الايصال تقريبا مع إخلاف بسيط لن يلاحظه سوي المسؤلين داخل المؤسسة.
قررت ابحث اكثر و قررت أدخل علي رسائل صفحة معانا لإنقاذ إنسان اللي كان ليا صلاحيات دخول عليها وقتها و كانت الصدمه !
وجدت صور لإيصالات إيداعات بنكية من داخل و خارج مصر تم تحويلها علي حسابات شخصية لبعض الموظفين بالمؤسسة و ده لان الموظفين كانوا بيقولوا للناس ان حسابات المؤسسة البنكيه موقوفه فبيبعتوا رقم حساباتهم الشخصية و بالتالي بيتم عليها التحويل … و طبعا كل هذه التحويلات كان بيتم إرسال إيصالات مزورة بها .. و بالتالي المؤسسة لم يصل لها من هذه التبرعات مليم واحد.
طبعا معايا مستندات بكل ده و بأسماء الموظفين و صور ايصالات التحويلات و قيمتها و تاريخها.
ولما بحثت اكثر اكتشفت انه كان بيتم إرسال بعض المناديب لاستلام بعض المبالغ المالية الكبيره من المتبرعين و للاسف لم يتم ايداعها في حساب المؤسسة في البنك … لاني اكتشفت ان المبالغ دي كلها تم تحصيلها بإيصالات من دفاتر مزوره لا المؤسسة و لا وزارة التضامن تعرف عنها حاجه !!
و طبعا لما بدأت شكوكي و أسئلتي تكتر قرر رئيس مجلس ادارة المؤسسة عمل مكتبين كول سنتر .. واحد تحت اشرافي (المدير المالي للمؤسسة) والتاني تحت اشراف (رئيس مجلس الإدارة) وكان دايما يبلغهم ان محدش يبلغني بأي شئ ويقولهم لهم بالنص (دي أسرار عسكرية) وكان في حرص غريب بإبعادي و عدم معرفتي باي شئ.
ده طبعا غير تبرعات فودافون كاش اللي اكتشفتها بالصدفه بأسماء موظفين في المؤسسة و بيتم نشر هذه الارقام علي صفحه المؤسسة و إرسالها في رسائل للمتبرعين و للأسف اغلب هذه المبالغ لم تدخل حساب المؤسسة و لا نعلم عنها شئ.
ده غير تحويلات علي ويسترن يونيون بأسماء و ارقام بطاقات شخصية لموظفين مقربين من رئيس مجلس الإدارة برضو محدش يعرف مصير هذه الفلوس ايه !
طبعا واجهت الإدارة و رئيس مجلس الإدارة بكل اللي اكتشفته وكنا فعليا كل يوم في مشاكل علما بانني كنت لوحدي بحارب وبحاول اصلاح الفاسد و تطهير المؤسسة ولكن بدون جدوى وسط تكتل داخل الإدارة لان الفساد كان خلاص طال ناس كثير.
وبعد ذلك فوجئت بتحويل كل متبرعين مؤسسة معانا لإنقاذ إنسان الي مؤسسة
(إنقاذ حياة) لأنني لست عضوا بها و ده أكد شكوكي .. و خلاني خلاص علي يقين ان أموال المشردين الغلابه بتروح في جيوب لصوص مش قادر احصرهم و لا عارف عددهم.
و النهاية كانت بعد آخر مواجهه بيني و بين الإدارة و رئيس مجلس الإدارة بالمستندات اللي معايا … فوجئت بعدها فورا بتكسير مكتب الهرم (اللي فيه المستندات) وتم سرقة كل أوراق المؤسسة من مكتب الهرم وتكسير المكتب وعندي فيديوهات بالوقعة والموظفين اللي قاموا بالتكسير.
ده غير حذفي من الصفحه الخاصة بالمؤسسة عشان مقدرش اشوف كوارث اكثر و مقدرش اجمع معلومات أكثر عن حجم الفساد.
قمت بعمل محضر بالواقعة و للعلم المكتب به دفاتر حتى نصف مايو ٢٠٢٢ … طبعا مصير هذه الدفاتر و المستندات ايه حاليا … معرفش !
في النهايه انا معايا كل المستندات والحسابات البنكية اللي كانت السرقه بتتم من خلالها .. وعندي صور بعض الايداعات اللي تمت علي حسابات الموظفين اللي جمعوا التبرعات و سرقتها و طبعا السرقه اكبر بكثير من الايصالات اللي معايا لان ده الجزء اللي قدرت اوصل له.
طيب انا بكتب الكلام ده دلوقت ليه ؟
عشان انا عملت بلاغات و استغاثات في كل مكان للاسف بدون اي إجابات … ارسلت المستندات لوزارة التضامن الإجتماعي و للاسف محدش عمل حاجه.
المطلوب :
– الكشف علي الحسابات الشخصيه البنكية للموظفين اللي تأكدت من سرقتهم للمؤسسة، و مواجهتهم بالمسروقات و سؤالهم عن المتورطين الآخرين.
– التحقيق معايا و مع كل المسؤلين في المؤسسة لمعرفة الحقيقه و لمحاسبة المخطئ
الكارثه كبيرة و تستدعي التدخل الفوري و السريع و الرادع .. لان المسروقات كبيره و السرقة مازالت مستمرة، و للاسف المسروقات بتاعت مشردين و غلابة و أيتام في وقت الغلبان مش لاقي لقمة عيش.
و حسبي الله و نعم الوكيل
ليرد علية محمود وحيد بالتالي
اللهم اني اشهدك إنني عشت في زمان إختلط فيه الحق بالباطل ، فلم يصبح الحق ظاهراً ولا الباطل واضحاً
لأول مرة هخرج عن صمتى وهتكلم
أنا مع كل هجوم علينا مش بشغل نفسي بالرد على الميديا وبقول خلينى مركز فى إنقاذ الحالات والهدف اللى بسعى ليل نهار من أجله…لكن للأسف الوضع بقى صعب جدًا لما صديق عمرى وأخويا اللى أكلنا سوا عيش وملح يخون الصداقه لأغراض شخصية ويحاول هو ومجموعه من أعداء النجاح وكارهين الخير بيسعوا من سنوات لهدم الكيان ..والكارثه ان صديقى المحترم عارف كويس الناس اللى هو إنضم لهم الآن حلم حياتهم هدم كيان معانا من سنوات لكن للأسف الطمع والجشع بيعمى القلوب !!!
*طيب ايه السبب لكل الحقد والكره ده ؟؟؟
البدايه لما اخد منى مبلغ مالى علشان يشترى سياره جديده والطبيعي لضمان حقى أخدت عليه شيكات وكان فى البدايه السداد منتظم لفتره وبعدها بدأ يرفض السداد كل شهر بحجه مختلفه
والتمس له الأعذار
ومن جهه أخرى زوجته بتعمل معنا فى الدار بدأت فى الفتره الأخيرة تمتنع عن نزول العمل وتأخذ مرتبها كامل
وهنا بدأت الخلافات وبدأت اطلب حقى منه وطلبت منه نزول زوجته للعمل كأى موظف يعمل ساعات العمل اليومية ويستحق مرتبه
وده استمر شهور لحد ما حصل هجوم منه على الدار وتعدى على النزلاء وتم عمل محضر بالواقعه (مرفق صورة الحكم )ومن هنا قررت أنهى المهزلة دى بالكامل إما الالتزام بالعمل أنت وزوجتك وسداد الديون أو هبلغ النيابة بالشيكات وده اللى تم بالفعل
وأخدت عليه حكم اخر بالسجن غيابى ..
بعد معرفته بما تم عمل بلاغات كيديه بكل الأوراق المزيفة اللى معاه فى وزاره التضامن الإجتماعى والاموال العامه والامن الوطني وكمان محضر فى الرقابه الإدارية و وتم تشكيل لجنه على أعلى مستوى لمدة ٣ شهور داخل الدار وفحص كل الملفات الخاصه بالمؤسسة وكل الايصالات وحتي حساباتي الشخصيه والنتيجه كانت لصالحنا من كل الجهات …
ولم تجد زوجته طريق للباطل آخر سوى تشويه سمعة المؤسسة فظلت ترسل رسائل علي الوتساب للمتبرعين تشكك فيه فى ذمة المؤسسة فتم عمل محضر آخر بهذه الواقعة
وبعد كل ما استقر داخلنا من يقين على حقد وبلطجة المدعى تم فصل حاتم زهران من أمانه الصندوق لعدم أمانته وتم فصل زوجته ..
وبعد تأكدة ان لاسبيل لأفعاله على أرض الواقع لجأ الي السوشيال ميديا للتشويه ووصل بيه الامر انهم عملوا صور مفبركه ليا في محاولة فاشله منه لأخذ ما لايستحقه.
احنا كل سنه قبل رمضان بيتعمل حمله هجوميه علينا وتشهير وده لضرب التبرعات و إسقاط المؤسسه
والمجموعه دي مش شاغلها الناس تترمي في الشارع.
لكن بنرد علي الناس دي بالطريقه القانونيه وبناخد عليهم أحكام وأولهم حاتم اللي منزل البوست وخداين عليه ٣ أحكام مرفقة في البوست
اللي معاه الحق يتجه الي القضاء مش بوست علي الفيس بوك
للأسف في بعض الكيانات مش عايزانا نكمل علشان أحرجنا موقفها بشغلنا
والدار مفتوحه للكل اللى حابب يشرفنا ويشوف بنفسه يتفضل الليل قبل النهار
شغلنا كله فى العلن
احنا كيان على أرض الواقع مش مجرد صفحه على الفيس والباب مفتوح للجميع
شرفونا وشوفوا بنفسكم
وأنا مش هتخلى عن حلمى ولا عن كيان معانا لحد ما أموت الا فى حاله واحده فقط
لو أنتم طلبتوا منى ده ؟؟
انا طول عمرى بقوى ومكمل بيكم أنتم سندى وظهرى …
اللهم إني أبرأ إليك من كل باطل مستتر أصيب بجهاله وأسألك الثبات علي الحق وان كان مختلط ، وأسألك البصيرة في الإختيار 🤲
