انت والتغيير

د / احمد خليفه
بنى سويف

التغيير احنا اللي بنختار نروحله مش هو اللي بيجيلنا
التغيير اللي بيحصلنا بسبب الظروف ويخلينا نتغير ده مش تغيير… ده ألم بيفوقنا
وفيه ناس للاسف ما بتفوقش
لما بنختار نتغير… حتي واحنا تعبانين ومش قادرين بس بنحاول وبنعافر برضه…. هو ده اللي بيزود اختياراتنا في الحياه ومبيخليناش مقهورين..مهما كانت ظروفنا صعبه
التغيير هو اللي بيخلي شباك الامل يتفتح وينور ظلام الالم
ربنا خلقنا وادانا قوة الاختيار
في ايدينا نختار اننا نخلي الالم يقهرنا.. وكمان نختار نهزم احنا الالم
لو بصينا حوالينا حنلاقي ان ناس كتير نجحت تختار تنجح وتختار توصل لهدفها وتختار انها ما تسمحش للظروف مهما كانت صعوبتها انها تكسرها… وتحافظ علي ابتسامتها لاخر جوله
مش معني كده ان الجولات دي مفيهاش دموع بالعكس… بس الرغبه في التغيير وفي الوصول هي اللي بتخلينا احنا نمسح دموعنا بايدينا وندور علي الطريق الصح علشان نوصل لو توهنا ..هي الي بتخلينا نكمل الطريق مهما كان طويل
الرغبه في التغيير هي اللي بتساعدنا ندور اننا نحقق لنفسنا السعاده.. منستناش حد تاني هو اللي يسعدنا
الناس اللي بتسعي للتغير دي ناس منوره.. كلها طاقه وحيويه… ناس ساعات بتفيض سعاده وايجابيه علي اللي حواليها
الناس اللي بتتغير للافضل… ناس عندها الرغبه والاراده….ناس ظروفها مش دايما سهله
ناس عايزه تكون افضل
ناس بتتحرك.. بتتعلم.. بتنجح
الناس اللي بتستني التغيير يجيلها.. غالبا بتكون لابسه قناع الضحيه عاجبها الدور ومستسلمه له
عاجبها الشفقه من الي حواليها ومن نفسها علي نفسها
ناس مستنيه تلاقي تعويذة التغيير علشان تقولها فحياتها تتغير
ناس مش عاوزه حتي تحاول
كل اللي بتعمله انها بتوارب باب التغيير وتبص من وراه وتخلي الخوف من التغيير والخروج من كوخ الامان الوهمي اللي بيخدعها ان اللي نعرفه احسن من اللي منعرفوش
مع انها ممكن لو خرجت من الكوخ تلاقي قصر جميل مستنيها تلاقي مفتاحه وتفتحه ومفتاحه مش مستخبي بالعكس هو بس محتاج منها تفتح بابها وتمشي وتدور عالطريق الصح
المهم تمشي وهي عارفه رايحه فين علشان متتوهش… تبقي مخططه حتمشي امتي وازاي
خليك انت اللي تصنع التغيير
متخليش التغيير هو اللي يصنعك
متستناش النور.. خليك انت النور
متستناش حد يسعدك.. خليك انت السعاده
متستناش حد يجيبلك ورده… هات لنفسك انت ورده
ازرع انت الورود