هنا فاقوس
عوض عبد العزيز
الشرقيه
مياه شرب يامقطوعة يا متعكرة .. وعفار وخنقة وطرق متكسرة
فاتورة الكهربا أسعارها نار .. يا الدفع يا الحبس مافيش هزار
زبالة ومش قصدي فاقوس .. زبالة عليها في شوارعها بندوس
دي حقيقة وواقع ملموس .. وناموس بيمص في دم ناموس
وكلاب ضالة بتعوي وسانة سنانها علينا
وبتستني بسلامة عينه الننوس
عندنا النواب موسوعة في محاميحوا
عندنا النواب موسوعة في قاموس
عندنا الوعي ناقص محرك وسلوك وتروس
عندنا أبراج مخالفة وأطيان وفلوس .. وعندنا كمان شارع للدروس
عندنا المستشفيات الخاصة أسمائها اسلامية .. وأغلبها غير مرخصة مخصصة للدفع نقدي من غير شيك
أحسن يشتكيك ويشكشكك بدبوس
عندنا المحليات حلق وخد وهات .. الشو مش كستور وخللي الطابق مستور .. الشو قماش حرير بس ادعك الفانوس
بياع الأوهام بيتاجر في الأحلام
يرسم خطط الدولة علي الارض بالطباشير .. والصور أهي ياما كتير
عندنا مواطن بيقدر يعني ايه إستقرار دولة
والمدينة الجميلة متعفرة وحزينة .. والخدمات ضعيفة علاولة
عندنا المدينة مهمشة لأن المسئول غير مفعول
صورة مجسدة من الواد محروس
فاقوس ليها تاريخ منصوص
وليها باع عربية بتباع .. وذكريات ياما في محاربة اللصوص
عندنا بنحارب الكورونا بدوخيني يا لمونا
هنا فاقوس تنتظر إعادة هيكلة
وحزمه خطط تنمية وقرارات مجدولة
هنا فاقوس تواجه البطالة وغلاء الأسعار تواجه الاستحمار
تواجه أصحاب المصالح الرخيصة ضعاف النفوس
