(شـعر)
أشرف الفراني
(مصـر)
…………………….
وطلعتى أغوَط
مما كُنت اتخيلِك !
قلبى تضخم م الوجع
والضغط زايد ع الضلوع
ما الخبطه جَات لي حين فرَشت المرحمه عشق وخيال .. طاعه وطوع
………….
– إنتَ اغتنَمت ف عُمرك الكاس لما لاَح
وفتَحت بجنونَك ف عز الضلمه
ألف طاقه للصباح
كيما تكون فارد جناح
تطوى السحاب
تفرَح وتحزَن تنتشى
ساقيه تشيل وتحط فيك كل الجراح
غنيت لغات ..
وضرَبت ع القلب بأنين الإنفلات
عِشت الحياه من غير حياه
من غير ممات
حِسَك حياد !
حطيت مشاعرك ف ارتباك
بين التكتم والبَوَاح
ضمِّنت نفسك بين قوسين
زي السهام اقرب من الوتر المُباح
مطلوق بعزم النزوي عطشان للهوي
مدَّاح وسَاحِب إيد شيطانَك للغوايه
والجوي سِم ودوا
بتلَّبِّس الإثم الصلاح
……………
-أنا كنت طاير بالغُنا حُر وبسيط
لا ليّه عش أئمن إليه
ولا ليّه قيد !
ومصاحِب البحر الغويط !
……………
– إنتَ اللى ف عنيك الخطيئه اتزينت
صوَّرتَها لعبة يقين
ودفَعت روحَك للحدود القصوي
من فِقه العَدَم
بالظّن كات رحلة حياتَك كلها
رحلة ألم
بالحلم قدِمت المحبه ف شوية كلام
وع المكاره كنت أنشودة نغم
ضحيت بنفسك .. والسلام
…….. صدقتها !
ووهبتها قبَس الحياه من بعد موت
حرَّكت فيها اللي اتنسى
صحيت صِبَاها من المنام
علِّمتها ترجع لأيام الضفاير والدَّلع
وخلَّقت جوَّاها الوَلَع
حوِّلت من أرض البداوه
بستان من جديد
رّجَّعتها نخله تميل مع الريح والبرَاح
حرَّضتها تعيش ف السما السابعه
سكرانه ف الكُفر المُباح .
