خفيفة الظل وخفيفة اليد ملكة الهاند ميد.. نهلة سالم: أطالب الجهات المختصة بدعم الصناعات اليدوية وفتح أسواق لمنتجاتنا

محمد عصام مصيلحي
شبكة أخبار مصر
29-62020
بنت منطقة فيصل – الجيزة تخرجت في كلية التربية الفنية، عرفت بخفة الدم وخفة الظل وخفيفة اليد أيضا لأنها فنانة رائعة تصنع كل شي بيديها صاحبة النفس الطويل بلا كلل أو ملل أو يأس، شاركت في معارض اوبن داي وهي معارض تمت في ساقية الصاوي ودرب 1718، كما شاركت في ايفينت فبراير يلا فسطاط بسوق الفسطاط في مصر القديمة..
أسست هي وشريكيها الفنان محمد كامل والفنان عبدالرحمن محسن ورشة فور آرت وجاليري في سوق الفسطاط بمصر القديمة.

سألناها عن اسمها وعمرها قالت: اسمي نهلة سالم وعمري الصحي 32 عاما اما بقي عمري العقلي مقدرش اقول انه اكتر من كده او اصغر لاني اوقات ببقي طفله جدا وبحب العب بالالوان والخامات المختلفه واوقات ببقي عقلانيه جدا وكأنني عايشه بقالي 60 سنه .
وبسؤالها عن بداياتها كان الرد :
بحب اتقن واشتغل كل حاجه بأيدي ومشتريهاش جاهزه من وانا صغيره جدا بحب حصة الرسم والرياضيات .. وكنت لما احب افضي دماغي اروح اقعد في غرفة التربيه الفنيه خصوصا في ثانوية عامه لدرجه ان المدرسيه كانوا بياخدوا الاسكتشات بتاعتي عشان تبقي تجربه للبعدي … واللي كان بيشجعني علي اني ارسم والون واصرف مصروفي كله علي الخامات والادوات والدتي الله يرحمها.

درست فى كلية التربية الفنية و بعد التخرج اشتغلت شوية في الهاندميد وكنت بنزل معارض واوبن داي مثل ساقية الصاوي ودرب 1718 .. ولم أكن متخصصه في حاجه وقتها .. وبعد كده بعدت شوية عن الهاندميد بس كنت بمارسه كهوايه من حبي فيه وبتابع كل جديد بره مصر واللي كان بيظهر في مصر كمان …

متى عدت للهاند ميد يا فنانة ؟
2016 رجعت تاني لجو الشغل ونزول المعارض لكن من غير تخصص معين … يعني كنت بشتغل شموع وتابلوهات بقشره الخشب واكسيسوارات باسلاك النحاس والاحجار سواء طبيعي او مطبوخة … حاجات كتير بحكم دراستي …

متى قررت النزول لسوق العمل وهل للشراكة دور فى تنمية شغلك؟
2018 لما قررنا انا ومحمد كامل شريكي اننا نفتح مركز تدريب وانتاج اعمال يدوية … ومع الوقت التخصص ظهر بقينا بنشتغل في الوحدات الديكوريه زي التابلوهات والانتيكات والتحف المستنتخه … بصراحه هو اللي كان بيشجعني جدا بعد وفاة والدتي اني اشتغل واطلع كل الطاقه اللي جوايه فالهاندميد وبيحفزني اني ابتكر … عملت اول تابلوه مع بداية فتح المركز من الايبوكسي مع الالوان الاكريلك ومع اني مكنتش راضيه عنه لانه اول تجربه في دمج الخامتين مع بعض الا انه عجب ناس كتير اوي وده شجعني جدا … وكملنا مسيرة المستنسخات وبدأنا نتطور منها عن طريق النحت … وده طبعا لاني دراسته في الكليه …

ما المشاكل التى تواجهك فى سوق العمل اليدوي؟
المشكله اللي كانت بتواجهنا التسويق وازاي نوصل لهدفنا بطريقه غير تقليديه وده اللي بنسعي له حتي الان … مش عاوزين نسوق ونبيع وخلاص … عاوزين نسيب علامه في عقل كل شخص بيتعامل معانا سواء اشتري مننا او لا … لانه لما بنسيب علامه في ذاكره شخص بيجي يوم ويقول لناس تانيه عاننا فبالتالي بنسوق لنفسنا بطريقه غير مباشره … من ضمن الصعوبات كمان الايدي العامله .. في المجال بتاعنا كل واحد يجي يشتغل بيبقي عاوز حاجه من اتنين إما أن يتعلم ويمشي يفتح مكان لنفسه او يتعلم وياخد مقابل مادي كبير إلا من رحم ربي وطبعا الموضوع بيحتاج مصروفات كتير لذلك أنا أطالب الجهات المختصة بتوفير معارض مجانية وفتح أسواق لمنتجاتنا أو تدعمنا بأي شكل من الأشكال حتى تستمر الصناعات اليدوية كفن جميل قديم له تاريخه الطويل.