#المسافه_صفر
(شعر)
أشرف الفراني
بدأت حياتي بالصُراخ
والانسلاخ من غيب دفين
وكأني نازل جوّا أرض الملحمه
أشبِه ف تكوينى أمشاج المحار
لا كُنت شئ محسوب
علي الخير البوّاح
ولا كُنت شر
بدأت حياتى ولا مفر
موتى المؤجل بالحياه
لسا له خطوه ..خطوتين ..
ويكون حَضَر
وبَلِف وف نفس الفَلَك
صوتى اللي محدوف بالأمل
موقوف علي ضوئى الخَفي
مين تحتفى
بميلاد هايُعبر بعد بكره
ويختفى
م الدنيا ويكون ذكريات
واستجدى ف الأيام
تُمر بحلوها وبمُرها
حِلفِت ورأسها ألف سيف
لترُدنى لحُضن التراب
زي الغريق ما اعرفشى
فيها أسرار أو خطر ..
….. بدأت حياتى
ف “المتاهه” بأسئله
مالهاش جواب
أنا اللى جيت ووجودى
سابق خطوتى
مرسوم مصيرى ف الكتاب
قدامى ألف خيار
ولكل واحد فينا
مفتوح له ألف باب
فيه اللي عاش مهزوم
وفيه اللي انتصر
فيه اللي قلبه زى الصخر
وفيه اللي قلبه سفنجه
ف رقة الروح تتعصر
فينا الفولاذ الصلب من عِز العناد
فينا اللي قلبه م الرحمه انكسر
فيه اللي ناكف واعترض
فيه اللي آمن بالقضا
وعاشها بحذر
الناس علي أشكال الطيور
فينا الحمام مظلوم ف شرع الطيبين
فينا النسور بتعيش علي دم البشر
دفعتنى أحلامي ما بين الصبر
واستعجال الجاى
وحياتى كلمه ونص
قاعده ع المحطه
ف انتظارى للسفر
أو ع الرصيف والشمس
تلهِب لى عروقى بالملل
بدأت حياتى تايهه
بين الجرأه ونزوع الخجل
فاتت كَـ سَهم مطلوق من سنين
ضِحكِت علىَّ بالحنين
وكتَبت آخر بيت
في شعر المهزومين
وضعِت لى رجلى
ف الطين السعيد
لكن بسوء المنتظر !
شايل علي كتافى الحجر
أصبَحت مضرب ف المثل
بدأت حياتى وانتهت
طبقاً لأحكام الأجل .
