ياوشوش كتير عيرة

الشاعرة_رضاعبدالوهاب

مش كل شىء ممكن 

ولا كل شىء ممنوع 

الحب لو أمكن 

الروح إليه بتجوع 

وأنا روحى معجونة

بالخوف وبالصلصال 

متشكلة بمونة 

تعبانة م الأحمال 

والجتة موجوعة 

والآهة مسموعة 

تعدى بالأميال 

والبرد بيكسَّر 

لو حتى ف بؤونة 

ولا كل من كشَّر

خاينين وباعونا 

وفاتونا ف السكة

مش كل شىء جايز

ولا كل شىء مسموح 

مين اللي كان عايز 

واتشق توبه جروح 

ومنعته الأبواب 

ياضمة الأحباب 

القلب مش للبيع

يامنتهى الذمة 

يا دمها المعقود

أنا ألف عمر بَضيع 

من قِبلى للإمة 

متبعترة سنينى

وبلمها فكة 

مش كل شىء هو

نوصلَّه بالتصريح 

الحب مش قوة 

أو ساحة للتجريح

إن ساب فسيب زيه 

واتساوى ف المشاريب 

ليه ترضى يوم ذُله 

ان قال هسيب .. مايسيب 

لا تتحمى ف ضله 

ولا تبعت المكاتيب 

لقا القلوب دا نصيب 

وقلوبنا مش سَكة

مش كل شىء ينفع 

تدَّفى بيه وتهواه 

ذِكر النبى يشفع

محبة ليه وصلاة 

كل الطريق ممدود 

ليه تمشى بالعوجة 

حتى الوجع مردود 

يجازيها دى الحوجة

ركنِتنا ع الدكة 

مش كل قلب بحب

ولا كل حُب بجد 

المر لو يتصب 

هنشربه ف كاسات 

ويبقى مية ورد

تحيى العليل لو مات

سيبك من الهرَّاب 

قُللك ماهى كتيرة 

يا قِلة الأصحاب 

ياوشوش كتير عيرة

بيعانا ف الشدة

ومتقلة الشيلة