لقد تم إستهلاك باقة طاقتك
د/ احمد خليفه
الحبل الدايب سهل يتقطع …والحاجه المشروخه سهل كسرها …
أوقات تسمع كلام عادي من حد لكن بيضايقك وبيوجعك …وأوقات يحصل معاك موقف بسيط وتلاقي نفسك انعزلت عن اللي حواليك ودموعك بقت هي ونيسك الوحيد
مع إن لو كنت في وقت تاني وسمعت نفس الكلام أو حصل معاك نفس الموقف مكنتش زعلت ولا حسيت بالوجع في قلبك ولا عزلت نفسك عن الناس …
لما توصل للمرحله دي بتسأل نفسك هو إيه إللي حصل أنا ليه وصلت لكده ليه كبرت الموضوع كده ؟
-إللي حصل إنك سبت نفسك لعلاقات إستهلكت طاقتك وخلصت على روحك ووصلت لمرحله إن أقل كلمه هتتقال هتوجعك …
-إللي حصل إن دي تراكمات وقت كبير وكل مره بتيجي على نفسك وتعدي مواقف بتبقى على حساب صحتك النفسيه …
– إللي حصل إن طاقتك خلصت مبقاش عندك القدره إنك تستحمل وتعدي وتكبر دماغك زي ما كنت بتعمل قبل كده …
وقتها بتفضل إنك تبعد وتعيش لوحدك لأنك هتكون وصلت لمرحله لا قادر تتكلم ولا تسمع ولاتشوف حد هتكون وصلت لمرحله نار الوحده ولا جنه إللي حواليك …
متستهلكش طاقتك مع ناس ممكن تكون مش حسه بيك ولا بتراعي مشاعرك حافظ على نفسك وحبها وقدرها وأبعد عن أي حد بيتسنفذ مشاعرك وبيستهلكها لصالحه
في ناس وجودها في حياتك إرهاق نفسي عاملهم بالحسنى لكن ماتسمحش لحد …يقتحم حدودك النفسيه .
