الإحتياجات النفسية

د/ احمد خليفه

الموضوع دا مهم وخطير و عامل ازمة كبيرة علي الشباب والبنات الا وهو نقص الاحتياجات النفسية

الاحتياجات النفسية حاجة بالظبط عاملة زي الأكل والشرب ، انت بدون اكل وشرب ، بتبقي مش متزن نفسيا ، ومش علي بعض ، وتبقي تعبان ومنهك ، ومش قادر

حاسس بحرمان بنقص ، موجوع متألم مجروح ، انت مش انت ، فقدت لحظات حلوة في حياتك وفقدت اهداف كثيرة في انسانيتك

في بنات قبل الزواج كانت راسمة صورة حلوة واهداف جميلة تحققها وهي مع شريك حياتها

في شباب قبل الزواج كان يتخيل حياة بشكل افضل بكثير من الي كان عليه الان بعد الزواج

ولكن الحقيقة اصبحت ابشع بكثير

الواقع اصبح الان عبارة عن ظلام كاحل مش باين ليه نور ، الزوجة مش مبسوطة مع جوزها وتشعر باهمال وتجاهل ……مفيش كلمة حلوة او لمسة رومانسية او حضن دافي…… تحولت هذه الزوجة الي ام مضغوطة ومشحونة وعصبية من كثرة الضغوط ونقص ملئ الاحتياجات النفسية

وهو ايضا اصبح يدخل المنزل الي دوامة من النكد والخناق والتنشنة مع مراته الي اصبحت مصدر هم وازعاج ليه

مش موضوعي خالص مين غلطان دلوقتي ولكن قصتي الحقيقية:-

ان هذه الزوجة في يوم ما ، هتلاقي نفسها بتنهار شوية شوية ، وهي بتنهار تبتدي بقي احتياجاتها النفسية تتحرك من الحلال الي مش لاقياه الي الحرام الي ممكن يملأ احتياجاتها النفسية

وتلاقي الزوج يبحث هيتجه هو الاخر الي ملئ احتياجاته النفسية عن طريق حاجتين :’

١- حلال مع زواج ثاني
٢- حرام عن طريق صحوبية او خيانة مع حد تاني

سيبك من قضية التعدد دلوقتي ، ولكن خلينا نركز عن ملئ الاحتياجات النفسية عن طريق الخيانة والحرام

خلي بالك مش قصدي بالخيانة هنا العلاقة الحميمة وان كانت جزء من تعريفها ولكن

هتلاقي في يوم زوجة ممكن تتعلق بجوز اختها علشان حنين او جارها علشان ساعدها علي مدخل العمارة وهي شايلة حاجات او دكتور ابنها علشان كلامه معسول او زميل العمل المتواجد في حياتها او مدرب ابنها الي بيدرب ولادها في النادي او ………..

هتلاقي الزوج مرتبط بزميلة الشغل او العمل التطوعي او …….. اكثر بكثير من مراته لانه حاسس ان مراته نكدية مزعجة عصبية اما زميلته فرايقة وفايقة وعرفت تستقطبه بتجيبله الفطار وكلامها مدلع وحاسة بيه

بص بقي علي المصيبه دي :-

ملئ الاحتياجات النفسية عن طريق الحرام ممكن كلنا وانا اولكم نقع فيها …… والسبب خمس حاجات :-.

١- وغزة شيطان
٢- انهيار نفسي
٣- ضغوط جامدة
٤- سبيل للتفريغ
٥- لذة مفقودة

واي حد ممكن يعمل الحرام بسبب نقص الاحتياجات النفسية سواء مسلم او مسيحي او يهودي ؟ سواء ملتحي او منتقبة او محجبة أو غير محجبة

لان كل دول اشتركوا في كلمة إنسان