#الوهــم … شبكه اخبار مصر
(شعر)
أشرف الفرانى
الخارجه من جوف الألَم
اِللي بتنزف روحك التايهه
ف قلب المهزله
النَص زي المقصله بيقطعك
يرميك فريسه للندَم
يدميك خيالَك يوجعَك
يشجيك حريق الروح ويشفيك النغَم
تنجيك شجون المهزومين بين
المبانى والمعانى ..
تموت وقلبَك لسه سكران ف المجاز
مهووس بما خَطَ القلَم
عايش في دور الفيلسوف
واِنتَ اِللي حدفَاك الظروف
فاهم بإنَك سيد الشُعرا ..
وأمير كل الحروف والكلم
هاتموت معاك كل الصور ..
وتموت !
ولا ذكرى تفضلَك رصيد ،
ولا يبقى منَك صوت
زي اللامعنى تفوت ويبليك القِدَم
ع الشط واقف لا ارتويت م النور
ولا للظنون عديت البر وحظيت بالنِعَم
تدخُل وتُخرج ؛ كما لو كنت شيئ من شيئ
ولاشيئ تكون .. زي تمثال واتهدَم
بالشعر خطيت للمصير باختيارَك
كان ف انتظارَك رحلة الغيب والعدَم
مجبول علي طاعة جموحَك
واشتهاءَك للملاك اللي اتهزَم
جوَّاك هايفضلك بقايا من نزوعَك للحقيقه
وتعيش مُدان
زي البرئ اِللي اتصدَم .
