،، كدة فات اسبوع ،،
الشاعر الكبير ،،سعيد شحاتة
مش عارف هأقدر أعيش إزاي
هو سعيد ينفع يتنفس
وفريده بعيد
ينفع ما اندهش واقول يا امه
قلبي واجعني
مين غيرك ممكن يسمعني
ويطبطب على قلبي الموجوع
مش يا امه كفايه عليا غياب
كده فات أسبوع
وانا بعدك ناقص روح وضلوع
العتمه قلوع
والصمت ف حرم الخوف مشروع
والقلب بدون أحباب مقطوع
والدنيا بقت من غير موضوع يُجبر ويسرّ
-سقعان رغم انّ العالم حَرّ-
مأسور وانا حُرّ
أيام بتمرّ مناجل فوق ضهري المحني
أسبوع وما حدّش روّحني
ولا حدّ لمحني غريب مهمل زي الأغراب
أسبوع والمصطبه مش ع الباب
والشيخ بيحاول يقنعني: لأجَلَنا كتاب
وعنيا سحاب عمّال بيفضّي وبيغيّم
ورجول الأحزان بتخيّم في القلب النور
متلخبط من أسبوع كامل في بيبان الدور
باب دارنا ما عادش يلمّ طيور ويوزّع فرْح
الموت واضح مش محتاج شرح
والشجر إياه مش جايب طرح
الورد ف أرض الروح دبلان
وسكوتي ف عين مولانا إيمان
وبكايا ذنوب
أنا أمي ما كاتش يا عم الشيخ إنسان عادي
كانت أيوب
تعطش تسقيني الريق سكّر
كان ريقها حليب طازه وخرّوب
وكلامها دموع
كل الناس نايمه وشبعانه
وعنيا بتتقطع م الجوع
مش يا امه كفايه عليا غياب
كده فات أسبوع
امبارح نمت على سريرك
شميت ريحتك
حسيت بإيديكي على كتافي
أنا من غيرك خايف جدًّا
بس انتي هناك اوعي تخافي
زرتك يوم الأربع حافي
ولا حدش خد باله على القهوه من الحَفَيان
خدت معايا شجرتين فيكس وزرعت ريحان
كان نفسي أزرع شجرة مانجا
قال لي المانجا تلمّ الدبان
– ازرع لي كافور
– جدره غشيم بيهد الجدران
الفيكس كان رأي الفلاح اللي بيزرع
وانا كان نفسي أزرع لك رمان
وأعمل بستان
زرع الفيكس وخد القرشين
ربك والحق مشيت زعلان
علشان الفيكس ما يشبّعش حزين وجعان
ولا يستر جتة واد عريان مجبر ع البرد
وكمان كان نفسي أزرع لك ورد
وأزرع لك توت
واحفر جنبك ساقيه بنبوت
واقعد نحكي
أسبوع ما سمعتش حكاويكي
عن خالتي عزيزه وستي وغيط عنب الباشا
ولا خوفك من طلة علوان
ودموع البدري على الشاشه
ولا دمع عيونك ع الغايبين
الشيخ بيقول لي الدنيا يومين
كلنا رايحين
اصبر واجمد وادعيلها وعيش
بيني وبينك… وانا عارفك يا امه تحبي الضحك…
كان ناقص للشيخ حبة ريش ويقولوا ملاك
كان نفسك تيجي معايا هناك
وانا كان نفسي آجي معاكي هناك
بس هناك عايز حد حبيبك يستناك
يدخل وياك
ويطبطب على روحك بشويش
علشان يفتح لك شيش مقفول
ويسيبك جنبك العرش تقول
مين اللي غواك
مين اللي اداك مفتاح باب الدنيا ووداك
مين اللي قرالك أو قرّاك أصل الأنواع
وإزاي النوع مش زيّ النوع
مش يا امه كفايه عليا غياب
كده فات أسبوع
علقنا التوم ليلة امبارح ع الشّرّاعه
حطيت الساعه اللي ف إيدي على الفرن الطين
ووقفت أنده علشان تيجي تشوفي الباقي
هنعلّق فين
فلقيت أم آلاء بتسألني: بتنده على مين؟
أمي..
بانده على أمـ….
يا أمّه
أمّه
هنعلّق باقي الأحلام فين
طول عمري باقول وياكي آمين
تابع خلفك شبه التابعين وانتي المتبوع
مش عارف أقوم من على بابك
وانا ناقص روح وعيون وضلوع
مش يا امه كفايه عليا غياب
، كده فات أسبوع ،
،ريحتك في البيت ،
