وحشتيني يا نور عيني
الشاعره رضا عبد الوهاب
انا كنت بتباهى بكلامى وازينه بيكِ
واجعل حروف اسمِك نغم واللحن كان ليكِ
دلوقتى طعم الغنا اصبح بكا وانا جاية أنعيكِ
اقول ف مين الشعر ومين يستمع مني
الحرف كان ينتفض لما اقول أمي
يتوضا من مبسمِك ويصلي ويسمي
ف حضرة جناب حضرتِك
كنت احتمى فيك
اشكي لمين دنيتي
دلوقتى من بَعدِك
كان اللقا فرحتى
لما التقى قُربك
صبح الأنين والبكا
لما ابتليت بُعدك
هفضل كدا أندهِك
حد ما أنام حدِّك
طيفي يزور مرقدِك
ويطوف على خدِك
ويبقى يوم المنى
أبوس على يدك
الحلم طوِّل أوى
ولا دا اصله كابوس
الموت دا أصله غبي
بيفرز وبينقي
يحش ضهر الصبى
من جدره مايبقي
لا ليه عزيز يختشى
منه ولا يخبي
ياخده كدا على الملأ
يادنيا يافانية
طب ليه بدأتِ السبأ
من توهة للتانية
ف الأصل والمبتدأ
من طين ورحنا لطين
زر الذهاب إلى الأعلى error: Content is protected !!