عابر سبيل

عابر سبيل 

بقلم / رأفت عبد العال

همسك حنين بيصحي فيا الروح

أمشي على كل الدروب وادوس

امسح جبيني وابوس كفي على المكتوب 

بدفع تمن واضرب كفوف بكفوف 

عابر سبيل لكن بوجه بشوش

بدفع حنين النبض من قلبي

وارمي بياضي بس ع المكشوف

يا الف سر وسر متداري 

يا كل ركن شايل حيطان داري

العين بتفضح كل احوالي

وتصب جوه الحلق مر وآسى ونحيب 

ومنين أجيب إيدين تشد العزم وتبارك

دا ف كل خطوة غيم وكسر تروس

وف كل حلم مستخبي كابوس

آخر المطاف بلقاني في مكاني

والقى عيوني ع المدى بتدوس 

ياللي حنينك همسُه بوداني 

نكراني ولا مش عارفاني 

ما عرفت مين جابني ومين وداني

ضلعي بيصرخ ويا احزاني

ياعمر راح ببلاش إحيني من تاني

عابر سبيل بلقاني في مكاني

يا مطيبين الآه وجعي أنا قاسي

وسهرت كل ليل طلع النهار أعرج ومش ماشي

ولا قالش ليا الصدق بس ما 

واشاشي

همسك بيصرخ من الوجع زيي

ندفع سوا كل التمن ونروح

عابرين سبيل ومعادتش فيها رجوع

عابر سبيل بس الأمل خانني

خلى الطريق قبض التمن مني 

ورماني في حضن الضنى والشوك

ياكل عُمر وعُمر بتنازع 

صوتك في حلقك بس مش مسموع

شبكة أخبار مصر ٢٠٢٢/١١/١٠