انتي_مين … (شعر)
أشرف الفراني
(مصر)
ياللي طول العمر واقفه
ف الفضا كالنخل فارده
والبراح الطلق طولِك
ياللي طول العمر كاشفه
للشقا عزمِك وسارحه له بطولِك
ياللي أنفاسِك حجر م النار تزمزم
وف ساعات الفرحه تبكي
زي زخات المطر يشبه هطولِك
ف اسوداد الليل بتضوي كالثُريّا
من زجاج العاشقين
ياللي واقفه ف المدي مشكاة ونور
ضحكتِك فيروز يلألأ بالجلال
طلتِك ف العتمه من طلة هلال
إنتي جدر الأرض صهباء الدلال
يستوي فيكي الخمير
يصلبِك عودِك ..ضمير !
تسبقِك ف الاندفاع المُر روحِك
ضربة النار تقوي بيكي
ومضة النور تسري بيكي
يتخلق صبرِك عناد
إنتي سِت الدنيا أسطورة البلاد
بين جناح الدهشه دوحِك
صدمتِك م النهر لو جفت دموعِك
لما عام الحزن طبطب مين يشوفِِك
واشتهاء القلب بين لمسة حروفِك
ينحنيلِك كل خوف
تركع الجرأة ف صلاة الصبح
تسجدلِك جباه
تبقي حيلتِك ف الحياه
بعد ما تعدي الزمان
تبقي إيه .. إلا رغبه ف الحياه
إنتي مين ، إنتي مين
غير الحياه .
