—————-
(شعر)
أشرف الفراني
(مصر)
أنا ماسِك
ما بين إيدى دليل عشقِك
لأهل الحَى بالكامل
وعشق الناس
وشرعِك ف الهوي حطِك
ما بين السِر والدّهشه
وكتم الوجد والنشوي
ف قلب الكاس
مسجل لِك كلام ياما
يايا “ليلي”
وموت الصَّب ما يسوى
غرام الملايين بيكي
ورّص قلوب مُحبينِك
علي إيديكي
وشوبيكى ولوبيكى
رضا بالِك
وحبي عتبه علي بابِك
ماهيش خضرا
لأنى ياحلوه موش يوسف
ولا انتى ستنا الطاهره
مع ذلك …
راح اتمرد وأتعرض للبلابِك
واخبى دموعِك المالحه
بضحكى العالى وبشالِك
عشان حُزنِك ف موالِك
بفكرنا
بأول مره زفوكي علي “عزرا”
وكيلك ف الدّنس جاهل
شهود العقد م الوزرا
جهود الشعب زغروته
وشربتللي وحبة شاي
ي هـ و د ى بطفش المعازيم
وماسِك فرع م “الغرقد”
وقال يعني بيضرب ناي
ويُزغُر ف الغويط باي باي
هنتقابل ف “وادى النيل”
ونرجع م “الفرح” حالفين
لَنُحفر قبرنا بفاسنا
ونقرا الفاتحه عبـ ـريه
ونخنق ف الخلا نفوسنا
ونقلع للسما روسنا
وندعي دعوه ملويه
لأن الحق ف عروقنا
يحيل الدم للميه
وصفحة جَبر مفتوحه
وهامش مِللي حُريه
وعشاقِك بيتباهوا بإفضائهم
وبوح البوح
حسن عاشقِك
وعنتر جثه من سهمِك
وقيس مجذوب
وانا عاشقِك
وجدعان البلد راهنوا علي ضمِك
وآه ياامه
ومن يَمِك شويه تحِني لولادك
وقارنى بالحدس مره
أنا شاري عسل مُرِّك
بدون ما ادرَي
ولاد الـ…… عادوا ف مزادك
يبيعوا اليابسه والخضره
مانيش هاتهجى ولا هاقرى
أنا حافِظ نصوص الظُلم والفَاقَه
وشَرخ الصَدر يا رفَاقه
سيناريو العجز والقدره
أناديكي ماتسمعنيش
أنا “ديكي” أكيد أذكي
لأنه نبيه
بيلحق فجرنا
واحنا ف عز النوم
ويسجُد للعُلا ويقرا
طلوع الشمس بتأجل طلوع الروح
وموت الأمس بيجدد نعيب البوم
وسيل الدّم ع القبله نهار الصوم
دموعِك مُره يا “عبله”
يا عاشقه الأرض ياصبره
غرامِك ف اللغه محموم
ما تعتصموش ف خندقكُ
لأن الخوف دا مشنقكُم
وخناقكم أكيد معصوم .
————————————–
* من ديوان [المتاهه] الصادر عن الهيئة العامة لقصور الثقافة ، عام 2000 م .
error: Content is protected !!
