كأنك_ملاك

 شعر
أشرف الفـرَّاني
مصر

* إلي سلطان تمغارت المستبد
في تمبكتو الصغري ………….

كأنك ملاك
بتوهب لروحنا السلام اِللي مات
تخدّرنا بالأغنيات القديمه
كأنك رسول المعاني الكريمه
وفاتح بلاد الجهَاله السقيمه
ورافع رايات
كأنك آيات التحرر بتهدي
لخوفنا الشجاعه
وتكشف لشوفنا الضعيف الطريق
تداوي جراح الحياه والممات
بتوصف روشتة آمالنا الطموحه
وتخفي رموز الرسايل علينا
تفسر براحتك غموض الآيات
وتربكنا دايما ما بين الكلام
وسِحر السُكات
وتنزل علينا بأطايب حنينك
وتضرب عصايتك ف نيلنا العزير
تفيض المغاني ف نهر الفرات
وتسحِر عيونّا وتخدع ظنونّا
وتطمس عقولنّا بالمعجزات
كأنك سفير المحبه المواتي
بسفينة خلاص الشعوب اِللي تاهت
بفعل الطوفان وقهر الزمان
وخوفنا اِللي آت
تشَرعّن وجودك بإسم الغلابه
وتنشر علينا فيوض السعاده
توزع حلاوه وتمر البداوه
عشان الكرامه وسُكر نبات
وتنقش عظيم الرسوم والكتابه
ونشرب ونسكر ونشكر ساعات
كأنك نبي الزمان السعيد
نبوس الأيادي ونركع عبيد
وتسمح نعدي بسلام ع الصراط
بتروي عطشنا عداله وعديد
ماهو اِحنا اللي بِملا طمعنا الفُتات
كأنك ملاك
بتوصل بضحكه لكل الغايات
بتوحي بجسمك
وتنطق برسمك بتعمل حاجات
ف فن الخطابه كأنك جيفارا
ويا للخساره
بتُنفخ ف قربه وتدّن ف مالطه
وخانك حصانك
وغلطة وجودك وفلتة نبوغك
تجّلَي ف حضورك كمال الصفات
كأنك ملاك
لا يشبه ف سَمتَك
وحسن ابتسامتك جناني الكهوف
ولا يبقي زيك ملايكه ف صفوف
لأنك بتقرا اللي غاب عن عنينا
وتكشف إلينا الغموض ف الكفوف
ترُد اللي غايب تفِك المُعطّل
وتجلب لقلب الصبايا العشيق
وتفسِد بقدرة جلالة سموك
عنوسة البنات
هايبقي اِللي زيك
“خساره ف أبونا”
يغور اِللي جابنا وخلِّف جدودنا
لا يعجب جنابنا حراره ف صقيع
ولا برد ينزل علينا يؤنه
كأنك بتصنع حياتنا السعيده
ما هو اِحنا اللي عشنا بمزاجنا ف طابونه
نلف السنين ونرجع مكانا
تيران السواقي ونحكي التاريخ
وضِعنا ما بين الحراك والثبات
كأنك ملاك
تفّجّر عيدان السنابل ف إيدنا
وترفع قواعد سواري المدائن
وتبني الحصون
عشمنا اِللي خطي معاك الصعاب
برغم الضغوط
دفعنا لآخر حدود الرباط
حزام ع البطون
طوينا الكتاب وتاه الرجاء
وجفت عروقنا وضاعت حقوقنا
مابين اصطبارنا وسيف الحياء
وحُسن الظنون اللي فاضل ما بينّا
وحبك وكرهك ملخبط كيانّا
هبطنا .. ومواتنا أماره ودليل
لأن البديل ف آخر المتاهه
بنفهم ولسه بنزحف لبكره
تردد وحيره
شجاعه وموات
وصوتنا الحزين اِللي حشرج ف روحنا
وقاطع نَفَسنا ف أنين النايات
مطوِّل حِبالنا مخلّع بيبانّا
وهادم أمالنا ف كل الحالات
كأنك ملاك .. كأنك ملاك .