أدب وشعر

طاسين_الأرض

 شعر
أشرف الفراني
مصر

يامين انتى .. يامين كُنتى
مابين الضرس والنّاب
وكفِك لسه ع الباب
بدمى بعد ما سكِنتى
بروج الرفض وراهنتي
علي أجلي
لا نوح عاد لِك ولا “سفنتى”
ولساه الطوفان راكب
علي طَّى اللسان وانتى
لا بتميللى لمِله وميلتى ودفنتى
وأدتى الحب وسافرتى
بلاد اللَّٰه وحزنتي
يامين انتى .. يامين كُنتى

ياخوص الكوخ يامتولول
ياعود البوص يامتعشَّق بأحشائى
ياجوعنا رجوع
عطشنا نعود من الأول
وترمينى في “جُب” العين
لا انا ساذج ولا حلاج
ولا ديبِك يوفى الدَّين
ولا شهودِك بدم التوب
يخونوا يصبروا يعقوب
لأن الدّم هينبأ علي بشارتى
يامين انتى .. يامين كُنتى

يابحر سوايفه شط الموت
ياوحشة ليل
ياخشة خوف علي جلدي
يطقطق شعرى يتنفض
يهيج بردى
وتتمدد تعاويذى
ياوسواسه وبتعاندى
اتيناهم كتاب الحق والملكوت
فكُن كان
فكنتى “الحوت”
لكن والِف على اليابس
ومتآنس علي صورتى
يامين انتى .. يامين كُنتى

يابنت العَاج
يافرعونِك يابنت التاج
تخوم الرَّمل حيَّاتِك
حدود المُلك “تابوتِك”
تعابينِك بخور سحرِك
قرابينِك/طقوس/أنغام/
ترانيمِك/عبادة شمس/
تكعيبة يخوتِك زهرة اللوتس
عبيدِك سُمر سُمَّارِك
ومُسمَارِك
بلاط العرش والتاج
أقابلك فين ؟
دانا آخر سُلالة طين
دانا طوَّاس
ومُلكى مِلكى هلاهيلى
بخورى شهقتى ف ليلى
عبيدى سكِتى ف ديلى
“عصايتى” كتابى تراتيلى
بذِكر العشق وبضربة ملامت
ينقسم بحرِك
ويطبق تغرقى ف صمتى
يامين انتى .. يامين كُنتى

يا أول بيّا ما آمنتى
محبه ف أهلى ومدينتى
“يابيت لحمك” علي عضمى
ياطولكرم خان يونس
تخونينى ياسالومي
تبيعى الضيعه وتقومى
علي نخبِك سقوط آيتى
وأقداس اللي خالقنا
وقدس الروح
لتتحول طلاسم عزمى وعزيمتى
وهاتكونى ف فجر الليل “كميدوزا”
دميمة الوجه وأسيره
مابين الوحشه والصمت
يامين انتى .. يامين كُنتى

حقيقتِك جَمرة النار
وصورتِك كف عفريتى
وضحكِك كدر فنجانى
وألوانِك بحمرة جفنِك القانى
ف غمضة جفن تذدانى
ياجسم الاسم رسم الإنس والجان
دَنا بينى وبينك تار
ومين فينا هايتغلب على التاني
دا انا أصلى أديم الطين واصلِك نار
خلقنى الرَّب لعبادته وفاطرنى
وانا نطفه علي سجودى
لا خالقني عشان حُبِك
ولا نبضى يكون انتى
دا خالقِك لجل ماتكونى
ضلوعي وتكتمل شيبتى
واعود الطين وللدود
علي ترابى وانا ف نومتي
يامين انتي .. يامين انتي .. يامين انتى .

اظهر المزيد

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock