(شعر)
أشرف الفـرَّاني
( مصر )
———————
ياما رميت الغوايه ليها حلو ومُر
سَحَبِت معاها الصبايا ف شبك بيغُر
لما نَطَقت الكلام من جنة المجانين
يشبه ف عِز الخيال مُفتتح للشّر
أنا اِللي واقف لوحدي بكتب الأساطير
بارسم جوارح كواسر كهيئة العصافير
أوهم بفقه المخادع إحيائي للموتي
وشيطاني عامل نبي وبينفُخ المزامير
الذنب ذنبي رغم اِني كنت برئ
صادني موج البحر خادني غريق
شديت معايا السبب ومسِكتها قشه
فجأه طوانا العبَاب والنَفَس بيضيق
كم مره بدفع تمن لِلِعبة الملاعين
إبليس يجوز يؤتمن ويرشد التايهين
ويعود بريح الزمن ويفضها سيره
أنا قلبي شاخ م الوجع وانقسم نُصين
لو فيكوا حد ملاك ارجموا جروحي
تبدأ حياتي ف هلاكي واستبيح روحي
أنا اللي راجي الأمان من رحمة الخالق
يطوي الزمان المتون والسر ف شروحي
لازلت امهد لها فوق الجِمار درب
يمكن تكون البدايه ف نهاية الحرب
واخد استراحة مغامر تلهمني توبه
وارمي همومي ع الرصيف واخلع الكرب
error: Content is protected !!
