الامان النفسي هو الامان الحقيقي

بقلم/مرفت عبد القادر

الأمان النفسي/ مش مجرد شعور بالراحة في وجود انسان بتحبه ولا هو مجرد حلم بيتحقق مع حد بيحبك ولا هو احساس بيتولد مع الوقت والقرب من حد قادر يطمنك وتطمن بيه الأمان أكبر من كده بكتير جدا الأمان إني أتصرف وأنا كلي ثقة ويقين إني أمانة بين ايديك إني أكون متأكدة إني مهما شفت وقابلت ناس هافضل أحس إني وطن محتل لحد ما تظهر وقتها بس هاستشعر إني فعلا جوا وطني الحقيقي وإن كل معالم الغربة جوايا مالهاش مكان
لأن وقتها هاعتبرك إنت المكان والأهل والصحاب والحبايب
اهدائك ليا شعور الأمان هو بمثابة اهدائك لي الحياة الأمان النفسي مش معناه بس إني أكون على راحتي في عفويتي معاك كلاما وأفعالا لاء ده كمان إني في الغياب عارفة وواثقة إني مالية مطرحي كويس ومكانتي عندك بخير و اخلاصك بخير الأمان الحقيقي إني أجمع كل ثقة الدنيا وأضعها فيك فلازم ما تخذلنيش ولا تستغل ده كنقطة ضعف الأمان النفسي إنك فعلا تاخذ مشاعري وخوفي وأخطائي وصدقي وطفولتي وغضبي وحزني وثقتي تحت جناحك الأهم من ده كله إنك تراعي ربنا في علاقتي بيك
و ده أسمى وأهم وأصدق معنى للأمان النفسي اسمع في جملة عظيمة كده بتقول لن تنضج حتي يهدم أمام عينك كل ما تؤمن به فعلا عمرك ما هتحس انك فهمت الدرس أو اتعلمت إلا لما تاخد درس يعلمك انك ماتديش لحد كل الحلو اللي جواك درس يعلمك ان الثقة أو الامان ما ينفعش يكونوا لأي حد وخلاص لمجرد بس انك أنبهرت بطريقته في البداية درس يعلمك ان كل اللي سمعته كان مجرد كلام