بقلمي جمال القاضي
ليه دايما نلقي اللوم على المرأه لما يقع عليها الطلاق ويتم الانفصال وإنهاء العلاقة الزوجية ، واي راجل بيشوف ست منفصله عن زوجها بينظر لها على انها مش كويسه وهيا السبب ،
طبعا الكلام ده عنها هي ممكن تكون بريئه وملهاش ذنب ، ممكن في كتير من الأحيان الراجل يكون هو السبب ، لأن في مجتمعاتنا المتخلفة في طريقة تعاملها مع الزوجة نظن انها هيا دايما السبب ، لاننا بنعتبر الزوجة هي مجرد خادمة وليس لها اي حقوق ، بنتعامل معاها بنوع من المنة مش بالعطف والسماحه ، بنتعامل معاها بلغة الأمر مش بلغة التفاهم والمحبة ، بنعتبرها شيء منبوذ في حياتنا ، مع اننا من غيرها بنكون تايهين وحياتنا ملخبطه ومش مترتبه ، بنتعامل معاها على انها شخصية بتمثل عبء مادي علينا من الاكل والشرب والملبس وغيرها ، وناسين انها ممكن تلم كل شيء بعثرناها وحاولنا نخلصه ،
ومش كده وبس فيه حاجات تانيه ، زي عصر الإنفتاح والتواصل بين البشر وجنسياتهم وثقافتهم المختلفه ، الراجل بيتغش وينضحك عليه من الكلام الحلو ال ممكن يسمعه من راجل تاني بس بصورة بنت ، لانه عارف مدى الحرمان العاطفي ال هو كمان السبب فيه وهقولكم ازاي الراجل سبب في إن زوجته عندها من ناحيته جفاف عاطفي ، طبعا من هموم الحياه والغلاء والأولاد وغيره من شغل البيت ال مبيخلصش طول النهار والليل وبالليل بتنام الزوجه ومش بتصحى لنفسها من كتر تعبها من الشغل ، وطبعا الراجل مش بيقدر كل ده ، هو عايزها زي ماكانت قبل ماتتزوجه يسمع منها كلام حلو ومش مشكله خالص تعبها ،
نسي كمان إن هو اصلا مش بيحاول يقول لها كلمه واحده من الكلام الحلو ال راح بقوله لغيرها من غير مسئوليه لبنت تانيه بيسهر ويكلمها طول الليل ، مع إنه لو قال كلمه بس منه هيلاقي من زوجته اجمل تعامل ،
طيب الست المنفصله ذنبها ايه في فشل زوج معرفش يتعامل معاها صح وبسرعه لما نعرفه انها منفصله تتحول في نظرنا لإنسانه منحله اخلاقيا وساقطه ، كل ده فكر خاطئ زي ماقولتلك ، وزي ما هيا في نظرنا سبب في إن زوجها يطلقها ،
الراجل كمان ممكن يكون السبب ، فيه ازواج كتير مدمنين ، فيه ازواج كتير كانوا مدللين من قبل الاب والأم وأي حاجه كان بيطلبها بيلاقيها مجابه وتحت رجليه وبالتالي لما اتزوج مقدرش يتحمل المسئوليه لوحده ، وحصل فجوه كبيره بينه وبين زوجته وال إنتهت بالطلاق ، ومش هلقي اللوم على الراجل لوحده علشان مكونش ظالم له ، وزي مافيه تمرد من الرجال فيه كمان تمرد من النساء لان منهم عايزه تعيش بمستوى اكبر من تحمل الزوج للنفقات ال تفوق بكتير دخله ، وبالتالي بيضطر آسفا انه يطلقها ،
نسينا كمان إننا عايزين في حياتنا الزوجه ملاك وليس بشر ، يعني مش من حقها تتعصب او تغلط ، مش من حقها تقول رأيها ، مع إن في كتير من الأحيان بيكون صح ، ومقتنعين من جوانا إن رأيها صح بس مش بتحاول نبين كده علشان متشوفش نفسها علينا ودي نظرية متخلفه طبعا ، نسينا كمان إننا مش بتعامل معاها زي الدين مابيقول ولاحتى بنحاول نقرى في كتب السيرة النبوية ونشوف إزاي رسولنا محمد عليه الصلاة والسلام كان بيعامل امهاتنا وأمهات المسلمين إزاي ونتعلم منه ،
فيه كتير حاجات غلط في حياتنا منها نظرتنا للمطلقات ، وفشلنا في الإستمرار مع الزوجة وفي الآخر المجتمع بيلقي عليها هيا لوحدها اللوم والسبب ، قبل مانتهم علينا نشوف وندرس ايه هيا الأسباب وليه وعلشان ايه وتتحل إزاي من غير مانظلم حد ، وبعدين لو كانت الحياه مستحيله بين إثنين خلاص كل واحد يروح لحال سبيله بدون الباقي مايسأل ايه السبب لأم الطلاق لاعيب ولاحرام بس يكون فيه أسبباب ومش كده وخلاص
