خدعوك فقالوا

بقلم دعاء سيد زغلول
بني سويف

خدعوك فقالوا الحياه مش بتدينا كل حاجه : –
-الحقيقه إنك طول الوقت عندك كل اللي إنت عايزه و محتاجه بس إنت بتدور علي حاجات تانيه .
– تكون مش بتشتغل و عندك وقت فراغ تقول اشمعني انا اللي معنديش شغل ولما تشتغل تقول يابخت اللي عندهم وقت.
– تبقي مش متزوج و عايش لوحدك بنوع من الحرية وعدم المسئولية ، تقول اشمعني اصحابي كلهم متزوجين ولما ربنا يرزقك بالزواج تبقي مخنوق من المسئوليه ومن إهتمام الطرف التاني اللي كنت بتدور عليه .
– يبقي لسه ربنا مرزقكش بأطفال وهتموت ويبقي عندك طفل ، ولما ربنا يرزقك بالأطفال تلعن دوشتهم و إزعاجهم واحتياجاتهم .
– ميبقاش معاك فلوس و مضايق ولما ربنا يكرمك بفلوس تقول اشمعني فلان معاه أكتر وبيصرف براحته وفلوسي علي القد ولما ربنا يرزقك بالفلوس الاكتر تلاقي نفسك بتقول السعاده مش في الفلوس.
– كل حاجه و نقيضها إنت عيشتها وكانت مرحلة في حياتك و مكنتش راضي في الحالتين.
– وده معناه إنك في كل الاوقات خدت كل حاجة إنت عايزها من الحياة بس مشوفتهاش الا لما كنت في وضع تاني
– احنا اللي دايما مش راضين و لو خدنا كل حاجه هنفضل طول الوقت ندور علي حاجات تانيه .
– المشكله عندنا إحنا ، ربنا رزقك بكل حاجه استمتع بكل رزق خدته وقول الحمدلله و اتأكد إن ربنا مش بيمنع عنك حاجه ، وكل اللي نفسك فيه وبتتمناه بتاخده في وقته بس انت بتتعود علي وجوده فتبدأ تشتكي وتدور علي حاجات تانيه .
– ركز في حياتك هتلاقي عندك كل حاجه بما يتناسب مع المرحلة اللي انت فيها. ، إشكر ربنا علي كل نعمه و إسعي و إجتهد و إنت بتستمتع بكل مرحلة بتعدي عليك ، و إتأكد إن المرحله اللي ناقصه وبتفكر فيها هتيجي في الوقت المناسب ، و المرحلة اللي إنت فيها ممكن تعدي و إنت مش حاسس بأهميتها علشان تركيزك مع مرحلة لسه في علم الغيب ، ولما تيجي بدل ما تتعود إنها موجوده وتنسي وجودها أو تشتكي منها ، إفتكر إنك في مرحلة كنت بتتمناها وبتتمني توصلها ، فلما ربنا يكرمك بيها حافظ عليها و قدّر وجودها .