ابنك مش بيركز في المدرسة ولا أثناء عمل الواجب “
د/ محمد الشيخ
الشرقيه
ابنك مش بيركز في المدرسة ولا أثناء عمل الواجب “
طب والحل !!
لازم نفهم الأول : لازم نعرف أن مدة تركيز الطفل في عمر ٦ ل ١٢ سنة قصيرة جدا …
دي إمكانيات المخ في السن ده
ببساطه بنقول ان المدة اللي الطفل يقدر يحافظ علي تركيزه فيها بتساوي عمره بالدقائق
يعني لو طفل ٧ سنين يبقي هيقدر يركز ٧ دقايق فقط …ممكن يزيدوا دقيقة او اتنين …و يبقى ما نزعقش للطفل اللي كل ٥ دقائق عمال يتلفت …ونراعي الجزئية دي
طيب قولنا نعمل ايه علشان نزود التركيز شوية
✍️ اختيار المكان المناسب : بعيدا عن التلفزيون أو التابلت أو مكان تجمع الأسرة لان ده بيشتت انتباهه وهيركز مع كلامهم مش مع المذاكرة أو الكتابة …ويفضل أنه يقعد علي كرسي ووجهه مواجه للحائط
اختيار التوقيت المناسب …يعني مايكونش تعبان أو جعان …أو ده معاد الكرتون المفضل …او ولاد عمه موجودين وعايز يلعب معاهم .
الاتصال البصري : لازم تخليه دائما باصصلك وانت بتقرأيه أ بتفهميه حاجة …. عشان تضمني أنه مركز معاكى
الأوامر البسيطة … يعني بدل ما تسأليه عن حاجة اديله الأمر مباشرة …يعني بدل ما تقوليله : فين القلم أو الكراسة مش عارف تلاقيهم
…قوليله روح هات كراستك يا قلبى
ماتشوفيش فيه شخص باباه عشان بيطلع علي عين الواد المسكين
التعلم الإيجابي : بلاش نهي كتير …قوليله الصح مباشرة
تنظيم أوقات المذاكرة …اعملي جدول بسيط وحاولي تثبتي معاد الواجب عشان يحس بالجدية
بلاش فترات انقطاع كبيرة يعني بلاش تطنشي الواجب ايام متتالية ورا بعض عشان هيبدأ يحس بعدم الجدية وهيكبر الطاسة
لازم تسمحيله بالحركة والالتفات كل ٧ ل ١٠ دقايق لمدة دقيقة واحدة …مثلا يروح يشرب مية …أو يكون في أيده كرة مطاطية يلعب بيها كل شوية عشان يفصل ويبدأ من جديد
الصبر ثم الصبر ثم الصبر : طبيعة الاطفال دماغهم في اللعب فما تعصبيش نفسك …حاجة طبيعية والله
