احنا في حالة حرب

د/محمد الشيخ

الشرقيه 

وفي الحرب .. التفاؤل ورفع المعنويات لا يعني

التسفيه من عدوك ولا الاهمال في استعدادك ضده .. نهائي ..

بصوا يا جماعة .. تعالوا نوصف الموضوع صح .. عشان نشجع بعض ونعدي الفترة دي .. وبكلام بسيط من غير مصطلحات طبية مجعلصة ..

الوباء زي حالة الحرب .. للأسف لازم يكون في الحرب مصابين وضحايا .. لكن الحرب مش بتستمر للأبد .. بتخلص .. والوباء برضه بيخلص ..

لو الجنود في الحرب محافظوش على معنوياتهم برغم وجود مصابين وضحايا .. حاتنهزم بسهولة .. علشان كده الجيوش بتعمل ادارة كاملة للشئون المعنوية .. علشان ده من ضمن الاستعدادات الأساسية زي الدرع والسلاح بالظبط ..

ومفيش جيش في الدنيا علشان يرفع درجة الاستعداد والالتزام يقعد يقول للجنود بتاعته يانهار اسود حنموت .. يانهار اسود حنروح فداهية .. يانهار اسود يانهار اسود ..

الحرب دي اتفرضت علينا وكلنا جنود فيها .. دكاترة وعلماء ومواطنين لحد اصغر واحد فينا .. كله له دور .. بنحارب وباء .. متصنع ولا طبيعي مش موضوعنا دلوقتي .. اهو وباء وخلاص ..

الكورونا وباء تنفسي .. والفيروسات التنفسية عموما سريعة الانتشار .. كثيرة التحور .. علاجها الوحيد هو جهازك المناعي .. وحتى المناعة ضدهم مابتبقاش طويلة الاجل .. اذا كانت مناعة بالاصابة او حتى بالتطعيم .. عشان الفيروس بيغير شكله مع كتر الانتقال وسرعته واخطاء النسخ للمادة الجينية بتاعت الفيروس ..

الميزة الوحيدة في سرعة الانتشار وكثرة المتعافين هو ان العمر الوبائي للفيروس بيقصر .. وبيستمر معانا كفيروس موسمي اجسامنا هاتعرفه وجهازنا المناعي هيتعايش معاه بصورة او بأخرى ..

التحور هايخليه ممكن يصيبك تاني وتالت زي البرد .. ولكن اذا عدت المرة الاولى بسلام .. ففرصة الشفاء من اي اصابة جاية بتبقى كبيرة جدا جدا الا في اوضاع استثنائية ..

يبقى احنا قصاد كل واحد بنفقده بنكسب ١٠٠ واحد اتصاب وخف وجسمه بقا في درجة استعداد معينة حتى لو مش كاملة ولا مستديمة ضد الفيروس لو اصابه .. وكل ما عدد المتعافين زاد .. كل ما العمر الوبائي قصر .. وفترة الحرب ماطولتش ..

التطعيم كمان هايساعدنا طبعا على تعرف عدد كبير من الناس اللي ماتصابوش بالفيروس عليه من غير اصابة اصلا .. يعني هايتحسب وكإنه من زمرة المتعافين من غير مايتصاب .. وده هايقلل وقت الحرب اكتر .. حتى لو اتصاب تاني وتالت بعد التطعيم .. لكن الجسم رفع درجة استعداده شوية ..

الفترة اللي احنا فيها دي هي اكتر فترة من فترات التفشي الوبائي .. الاصابات كتير اوي اوي .. المتعافين كتير اوي اوي .. وفيه ضحايا ربنا يرحمهم .. وحالات حرجة ربنا معاهم .. زي اي حرب ..

والمطلوب ايه؟؟

اولا .. اتعامل مع اي اعراض مرضية تحس بيها الايام دي على انها كورونا الى ان يثبت العكس .. لا تتخض ولا تتهز ولا تتوتر .. بس التزم البيت لو اعراضك بسيطة مش مزعجة .. واعزل نفسك عشان ماتعديش حد ..

ثانيا .. لو الاعراض مزعجة تنزل تكشف وتستشير طبيب مختص عشان هو اللي هايحددلك خطتك العلاجية .. ماتفضلش تعمل فحوصات واشعات وتاخد علاجات مع نفسك كده ولا من بوستات الفيسبوك ..

ثالثا .. لو انت بقا سليم الحمد لله .. يبقى الكمامة ابوس ايدك .. واغسل ايدك دايما .. وبلاش تزاحم .. ماتروحش مشاوير ملهاش لازمة الايام دي بالذات خلينا نخلص .. وبطل لطم عالفيسبوك وولولة وصوات ويانهار اسود يانهار اسود .. تماسك كده واثبت وشجع الناس مش تحبطهم وترعبهم .. الاعمار بيد الله يا سيدي ..

رابعا .. بلاش تدخلوا السياسة في الموضوع ده الله يستركم .. بلا مع الدولة بلا ضد النظام .. هي مش فرصة لاثبات صحة وجهة نظر سعادتك السياسية .. دي ارواح ناس .. وارزاق ناس .. اتقوا الله ..

وأخيرا معلش الفترة دي صعبة .. وكلنا فقدنا ناس عزاز علينا ربنا يرحمهم .. بس هاتعدي .. زي الحرب ما بتعدي .. وكل ما العدد بيزيد اوي كل ما تعرف ان الأزمة قربت تنتهي .. بس نعدي الفترة دي بسلام .. وهفضل على طول اقول تماسكوا وتفاءلوا حرصوا وماتخافوش .. لا حاشارك في لطم ولا سواد .. حتى لو المنهج ده ضايق البعض ..

اجمدوا هانعدي .. ربنا يحفظكم ..