حالة شرود
رأفت عبد العال
إتخنق جوايا شيء
وانتفض فيا شعور
طعم الألم !!!
ضاق الطريق ضاع الأمل
لحظة سكون لحظة سكوت
حالة شرود وقت الغروب
دخل النهار جوه الضلام
صحى الألم !!!
في الانتظار بين الآهات والذكريات
الرحلة جوه جبال الخوف متقيدة
والصبر كان مجدافي لليوم الجديد
نسيتي ليه كل الوعود !!!
رغم إني عارف سكتك معرفتنيش
من نبرة الدمع اللي صرخ
في الحفون معرفتنيش!!!
من خطوتي من لمستي اللي
حناها الأمل معرفتنيش
مليون سؤال وما ردتيش
مع إن كان اسمي يونس
وحدتك معرفتنيش!!!
من آهاتي ومن سكاتي
وخطوتي معرفتنيش
ليه خدتي تأشيرة سفر
قبل الميعاد ومقولتليش
رغم إني عارفك مبتجرحيش
طب كنتي قولي علشان
اصاحبك في السفر
أو كنتي فوتي وعدك للقمر
مكتوب ياغالية ع الجبين
إني اتوه عن سكتك !!!
وتتوهي إنتي ف دايرتك
نامي بحفظك الله ما عادش
يوم تتألمي ولا تشتكي
لحظة سكات قدام جلال
الموت بيموت الكلام
وينولد السكات !!!!
شبكة أخبار مصر ٢٠٢٠/١٠/٢٤