نوح الفجر
بقلم/ رأفت عبد العال
ياللي ابتليت بالعشق
ورماك الحنين
مين اللي جبرك ع الأنين
أيوب رماه البين
والصبر كان مجدافه للسنين
لكني مش أيوب !!!!
وشوشت قلب الليل والدمع
كان مواويل
انا أصلي بعشق الحلم الضنين
انا أصلي موجوع من سنين
فمتقوليش بكرة الوليد
طالع من قلب نوح الفجر
بيشق الأنين
ولا تقوليش إن عروق الدم
جمدها الحنين
ياما ناحيت الهمس مين
اللي محسوب ع السنين
اللي رماه البين !!!!!
ولا اللي مات جوه الآهات
وصاحب الليل والسكات
مين اللي محسوب ع السنين
ياللي قريت كفي كدابه
دي البشرى مين اللي شاف بكرة
مين اللي عرى حلمنا
وكشف دفانا وسترنا
وهتك ودادنا وعمرنا
ملعونة دي البشرى
وفين حدود بكرة
ياللي معاك مصباح حجيت معاك للنور
إوعاك تفوتني للضلام
ينهش بصيص الشوق
خليني صاحب طريق
لا كنت صاحب رسالة
ولا كنت يوم أيوووووب
قلبي عملته ضريح وشوش ضلوع الريح
وطرح لي صبارة مسقية
بالحنة مجروحة من جرحي
مصبوغة من حزني !!!!
متكلمة متألمة متعلمة
وآخدة الوفا صاحب
ياللي قريت كفي ملعونة دي البشرى
مين اللي شاف بكرة
بكرة اللي جاى مدبوح
سفير لقلب النوح بيردد المواويل
عاشق بقى ومعشوق
لكني مش ايووووب لكني مش ايوووب
شبكة اخبار مصر ٢٠٢٠/٨/٥
