*
(شعر)
أشرف الفراني
(مصر)
لساكى شمس بتحضني الأرض الحزينه
لساكى نهر يفيض بروح مالهاش حدود
لساكى حلم بيرسم اليقظه ف عروقي
لساكى عود بيطن باللحن الجميل
عود تلفحه رياح البراءه وبهاء الكمال
لساكى صحرا بتضحكى تحت القوافل
لساكى ياليل النوافل تكتبى رغم انتحارك
إنتي الزمان مرسوم ف دايره
زي قرص الشمس وبتنزف شعاع
تروى خريطة الدم بسخونة جلالك
وتأسسى جغرافية السلالات
أزحف لقُربك فوق بساط العشق
وأشوف مملكات التبر بعيون القلوب
تترد فيَّا المعجزه بسيف المدارك ..
رد روح
لساكى ريف
بيعلم الشُعرا الخجل
وبنتغسل فوق مصطبة
ريح الحياء
ونعبي أنفاس محياكى
عديت فوق صوابعى العشره ميثاق الوجود بين ظهرانيكى
إنى اعترف
بحمة العشق الفجائى
واعرى نفسى بنفسى
قدام خمر السواقى
وأنفخ ف كفى للدفا
واقتنص من قلب حرمانك صفا
واكبح جماح الشهوه ف العيب
واخلع يقينى من بحور الغيب
مسبحتى مذبحتى
وطواحينى ف السما السابعه
لا عمرى هزيت للخلاص نخلك
ولا ف الأفق شوفت الخيول راجعه
من فوق سطوح القش
كات انطلاقى للبراعه
رغم الموّات المزمن
لسه ف الأجل ساعه
جرجرنى ليكي طمع الخيال للأرض
والصدفه جبلتنى ع المرحمه والطاعه
ففردت قوس قزح
منديل مزهر بالدموع
منقوش عليه برج الحداثه وسهام اللئام
ومربعات مطلسمه بخط الغمام
وبقايا م الورق القديم
إصفّر من كُتر اجتراره
شعري بقي مشبوه
لا أم بتعرفه ولا بيعترف بأبوه
أنا اللي فنيت قدر طاقتى بالكلام
غنيت ساعات كتير بصوت قذر
وسمعت أصوات كالغثاء
لكن بحجم الصدمه هيكون الرجاء
مافضلشى فيا غير لسان بطولى
جامح عويل ، بِكرَه بموت
ويحب يوصف ف الحياه الموت
راكب فرس م الشرق عالى الصوت
لكنه ف الصمت الطويل
فارس بطولى
غاندي بعت لى الحكمه بمداد زعفران
لكنى ظنيت فيه ظن سوء
والفلسفه كانت غوايتى من زمان
جربت فيهم كل أنواع البلاغه
فرَّغتهم من كل معنى وله دلاله
صكيت لهم ميت مصطلح
وخلقت ف ضلوع الحنايا ألف سكه للجدل
لكنهم كانوا ببساطه كلمتين
جايين مع روح البدائى من سنين
إن فاتوا ع الليل يبتسم
ويهزوا أعضاء النهار
وان شافوا ناس بيموتوا فوق الأرض
تهديهم نشيد الخُلد ف كشوف الشهاده
وان شافوا ناس بيفرطوا
يتبرجلوا داخل مثلث لاِعتراض
فتهاجر طيور النورس الفضى السواحل
وتهيج رمال الدنيا تتعفر وجوه التلج
تِحمض الميه ف البير والجداول
ونختلف إن الوضوح كالشمس
موش عايز دليل
وان الكلام لو لم يكرر كان نفد .
———————————————
* نُشرت في مجلة “سنابل” الأدبية ، كفر الشيخ ، 2006 ، رئيس التحرير الشاعر الكبير/ محمد محمد الشهاوي .
error: Content is protected !!
