أدب وشعر

رسالة من، الشهيد

جمال القاضى


شوفتك مره حزينه بتبكي
حاسس بيكي
حاسس بمر فراقي
بس هقولك يا أمي
بلاش الحزن وخلي
قلبك يفرح لأني شهيد
إيوي شهيد
أول يوم روحت لسينا
قلت هناك إرهابي
داير يقتل كل جنود يقابلها
بأي كمين
كان يقولوا له لو هتموت
تبقى شهيد وفاكر إنه بجاهد
لأنه مش متعلم ولافهم دينه
يفسر حتى الٱية بمعنى غريب
غير مفهوم وبفهم عقيم
زي عروسه بخيوط مرخيه
يشدوا خيوطها ويلعبوا بيها
وعقله مفيش
عقله لغيره يلعبوا بيه
إضرب يضرب إقتل يقتل
وبدون تفكير
ولما سافرت لسينا ياأمي
كنت بقول لازم أحارب
لازم أطهر أرض بلادي
أرض جدودي لأن رمالها
فوقها الدم كان بيسيل
كانوا يحاربوا عدو جبان
كانوا بيعرفوا عنه
كل صغير وكل كبير
وإتبدل غيره بعدو جديد
من نفس بلادي ومش حد غريب
سافرت وهناك كان الموعد
عند كمين بجنب طريق
دارت كانت حرب مابينا عنيفه
ضحايا وراحوا منا كتير
شوفت هريدي جني شهيد
وكان لسه عريس
وغيره محمد جنبه وماسك لسه
في إيده سلاحه بيضرب بيه
بس أنفاسه خلاص بتودع
بعد رصاصه ماصابت صدره
وكان بيوصيني وصيه أخيره ويقولي أمي مريضه
ومعاها إخواتي صغار
روح زورهم مره وغيرها
تفكرهم بيا
كأنه فاكرني لسه هعيش
بعد ثواني مدفع كنت أنا
بدافع بيه وبقتل غادر
حامل عقل عقيم
مش بيفكر بيه
بقتل وأخد حق زميلي
وبدافع عن أرضي وأرض جدودي
رصاصة لاقيتها صابت قلبي
عرفت ساعتها إني خلاص
إني معاهم أصبحت شهيد
وقبل ماأموت كتبت رساله لأمي
أوعي ياأمي أشوفك تبكي
لما يشيلوا جثماني ويرجعوا بيه
لأني كنت أتمنى أموت
فوق أرضي وفداها أبقى شهيد
أوعي ياأمي أشوفك تبكي
وقولي لزوجتي وولدي إني شهيد


اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock